Erbaian Muhtardyń qazirgi jaǵdaiy belgili boldy. Bul týraly Erbaian Muhtar isindegi qorǵaýshy Inga Imanbai aitty, - dep habarlaidy Dalanews.kz.
Onyń sózinshe, Erbaiannyń jaǵdaiyn óz kózimen kórip, aldaǵy eminiń jalǵasýyn jáne qylmystyq istiń tergeý barysyn ata-anasymen talqylaǵan.
"Shúkir, jaǵdaiy birqalypty. Sońǵy ret ony Ystambulǵa ushar aldynda kórgen edim. Qazir áldeqaida jaqsy: salmaq qosyp, beti tolysyp qalǵan. Bir aidan keiin emniń ekinshi kezeńi – reabilitatsiia bastalady. Erbaianǵa da, ata-anasyna da sizderdiń ystyq yqylastaryńyz ben qoldaýlaryńyzdy jetkizdim. Olar barsha halyqqa alǵysyn jaýdyryp jatyr.
Biz birge qoldaý kórsetip, Erbaiannyń aiaǵyna nyq turýyna kómektesemiz! Al qylmystyq is boiynsha Erbaiandy osy kúige túsirgender tiisti jazasyn alǵansha kúresti toqtatpaimyz. Ádilettik úshin birgemiz!" - dep jazdy zańger.
Aita keteiik, Erbaian Muhtar 2024 jyly jeltoqsanda aýrýhanaǵa tústi. Ulttyq ulannyń áskeri bólimindegiler ata-anasyna onyń ájethanada qulap, basyn soqqanyn aitqan. Alaida olar bul nusqaǵa senbei, Erbaian soqqyǵa jyǵylǵanyn dáleldeýge tyrysty.
Qazaqstandyqtar jas sarbazdyń emine 230 million teńge kóleminde qarajat jinady. Qazir Erbaian Muhtar Astanada, ol Túrkiiada emniń alǵashqy kezeńin aiaqtady.
Jýyrda bas áskeri prokýrordyń birinshi orynbasary Maqsat Qaziev tergeý qalai júrip jatqanyn aitty. Prokýratýra ókili naqty kúdiktiler joq ekenin de jetkizdi.
