Qazaqstan Respýblikasynyń Básekelestikti qorǵaý jáne damytý agenttigi Qazaqstan Respýblikasynyń Tsifrlyq damý, innovatsiialar jáne aeroǵarysh ónerkásibi ministrligimen birlesip, salanyń quzyretti mamandaryn tarta otyryp, Iandeks Taksi kompaniiasynyń algoritmdik baǵa qalyptastyrý tiimdiligine aýdit júrgizdi. Aýditten ótý mindeti Iandeks Taksige monopoliiaǵa qarsy komplaens aiasynda júktelgen bolatyn, dep habarlaidy Dalanews.kz.
Aýdittiń maqsaty — Iandeks Servisin, onyń ishinde taksi qyzmetteriniń baǵasyna áser etetin sharttar men parametrlerdi zerdeleý boldy.
Atap aitqanda, júieniń arhitektýrasy, baǵa qalyptastyrýdyń bazalyq jáne dinamikalyq komponentteri zertteldi, sonymen birge áýejai aimaqtary men qalanyń ortalyǵynan alys aýdandardaǵy erekshelikter, sondai-aq operatsiialyq protsester qarastyryldy.
Aýdittiń bastapqy qorytyndylary boiynsha baǵa belgileý júiesinde birqatar táýekelder anyqtaldy. Keibir táýekelder joiyldy, al qalǵandary boiynsha Iandeks olardy joiý jóninde mindettemeler qabyldady.
Osylaisha, Agenttiktiń habarlamasy negizinde paidalanýshylarǵa arnalǵan adaldyq baǵdarlamasynyń erejeleri (Iandeks+ baǵdarlamasy) ózgertildi, nátijesinde Iandeks osy baǵdarlama boiynsha barlyq shyǵyndardy (klientterge usynylatyn jeńildikterdi) tolyq óz moinyna aldy.
Iandeks qoldanystaǵy komplaens júiesine mynadai ózgerister engizdi:
- taksi tarifteriniń jáne jol júrýdiń bazalyq qunynyń qymbattaityny týraly Agenttikke 3 kún buryn habarlaý;
- áýejai mańyndaǵy keibir turǵyn aimaqtardy áýejai tariftik aimaǵynan alyp tastaý (1 apta ishinde);
- jol júrýdiń bazalyq qunynan eki ese asatyn somadan komissiia ustamaý (bul júrgizýshilerdiń tabysyn arttyrýǵa yqpal etedi);
- «Ekonom» tarifindegi komissiiany ár qalada eki jylda bir retten jii kótermeý (atalǵan tarif eń suranysqa ie tarif bolyp tabylady);
- maksimaldy suranys jaǵdaiynda tarifti úsh eseden artyq kóterýdi shekteý (mysaly, aýa raiy qolaisyz kúnderi nemese mereke kúnderi, mundai saparlar ár toqsanda ár qalada barlyq saparlardyń 5%-ynan aspaýy kerek, bul talap naqty kórsetilgen);
- suranysy tómen aimaqtar úshin tarif quramyndaǵy qosymsha tólem komponentin paidalanýshy qosymshasynda túsinikti kórsetý;
- 2025 jyldyń 30 maýsymynan keshiktirmei paidalanýshylarǵa sapar baǵasynyń tolyq qurylymyn qosymshada kórsetý;
- tehnikalyq qoldaý sapasyn arttyrý, atap aitqanda, paidalanýshylardyń ótinishterin óńdeý algoritmin ońtailandyrý.
Budan bólek, Iandeks Taksi paidalanýshylardy taksi qyzmetterine suranys deńgeii týraly habardar etý sharalaryn jaqsartpaq. Atap aitqanda, «Ekonom» tarifinde suranys óte joǵary bolǵan kezde (mysaly, aýa raiynyń qolaisyzdyǵy kezinde) synaq rejiminde virtýaldy kezek júiesi engiziledi. Bul júie arqyly paidalanýshy qansha adamnyń taksi kútip turǵanyn kóre alady jáne tańdaý jasai alady: kezekke turý, basqa tarifti tańdaý nemese qoǵamdyq kólikpen júrý.
Iandeks Taksi antimonopoliialyq komplaens aiasyndaǵy mindettemeleriniń oryndalýy Agenttik janyndaǵy arnaiy monitoringtik toptyń baqylaýynda. Onyń quramyna kásibi qaýymdastyqtardyń sarapshylary (bastamashyl toptardyń, Kólik, Eńbek jáne halyqty áleýmettik qorǵaý, Ádilet, Tsifrlyq damý jáne innovatsiialar ministrlikteriniń, sondai-aq taksoparkter qaýymdastyǵynyń ókilderi) kiredi.
Úkimetke jeke kásipkerler úshin arnaiy salyq rejimi boiynsha salyqtyq eseptilikti jeńildetýge qatysty zańnamalyq túzetýlerdi jedel engizý jóninde usynystar joldandy. Bul ózgerister taksi júrgizýshileriniń tabysyn arttyrýǵa yqpal etedi.
