Qazaqstanda ushaqtardyń jumysyna ádeii kedergi keltirgender qylmystyq jaýapqa tartylyp, 10 jylǵa deiin bas bostandyǵynan aiyrylýy múmkin, dep habarlaidy Dalanews.kz.
Bas prokýratýranyń málimetinshe, lazer nemese dron paidalaný ushqyshtyń kórý qabiletin ýaqytsha buzyp, apatqa ákelýi yqtimal. Sondyqtan mundai áreket ushý qaýipsizdigine tikelei qater tóndiredi.
Aviatsiialyq qyzmetterdiń deregine súiensek, sońǵy 6 jylda osyndai 98 jaǵdai tirkelgen. Eń kóp oqiǵa Almaty halyqaralyq áýejaiynda boldy. Eger 2017 jyly bar bolǵany 8 habarlama jasalsa, 2023 jyly bul kórsetkish 30-ǵa jetken.
Buǵan deiin mundai áreketter úshin arnaiy jaýapkershilik qarastyrylmaǵandyqtan, kinálilerdi jazalaý qiyn edi. Alaida 16 shildede qabyldanǵan zańǵa sáikes, Qylmystyq kodekske jańa 352-1-bap engizildi.
Endi áýe kemesin basqarýǵa kedergi keltirý aiyppuldan bastap qamaýǵa alýǵa deiingi jazaǵa ákep soǵady. Al aýyr zardaptarǵa ákelgen jaǵdaida kináli 10 jylǵa deiin bas bostandyǵynan aiyrylýy múmkin.
