قازاقستاندا ۇشاقتاردىڭ جۇمىسىنا ادەيى كەدەرگى كەلتىرگەندەر قىلمىستىق جاۋاپقا تارتىلىپ، 10 جىلعا دەيىن باس بوستاندىعىنان ايىرىلۋى مۇمكىن، دەپ حابارلايدى Dalanews.kz.
باس پروكۋراتۋرانىڭ مالىمەتىنشە، لازەر نەمەسە درون پايدالانۋ ۇشقىشتىڭ كورۋ قابىلەتىن ۋاقىتشا بۇزىپ، اپاتقا اكەلۋى ىقتيمال. سوندىقتان مۇنداي ارەكەت ۇشۋ قاۋىپسىزدىگىنە تىكەلەي قاتەر توندىرەدى.
اۆياسيالىق قىزمەتتەردىڭ دەرەگىنە سۇيەنسەك، سوڭعى 6 جىلدا وسىنداي 98 جاعداي تىركەلگەن. ەڭ كوپ وقيعا الماتى حالىقارالىق اۋەجايىندا بولدى. ەگەر 2017 جىلى بار بولعانى 8 حابارلاما جاسالسا، 2023 جىلى بۇل كورسەتكىش 30-عا جەتكەن.
بۇعان دەيىن مۇنداي ارەكەتتەر ءۇشىن ارنايى جاۋاپكەرشىلىك قاراستىرىلماعاندىقتان، كىنالىلەردى جازالاۋ قيىن ەدى. الايدا 16 شىلدەدە قابىلدانعان زاڭعا سايكەس، قىلمىستىق كودەكسكە جاڭا 352-1-باپ ەنگىزىلدى.
ەندى اۋە كەمەسىن باسقارۋعا كەدەرگى كەلتىرۋ ايىپپۇلدان باستاپ قاماۋعا الۋعا دەيىنگى جازاعا اكەپ سوعادى. ال اۋىر زارداپتارعا اكەلگەن جاعدايدا كىنالى 10 جىلعا دەيىن باس بوستاندىعىنان ايىرىلۋى مۇمكىن.
