Aldaǵy birneshe jylda Qazaqstanda myńdaǵan mamandyq mańyzyn joǵaltyp, olardyń ornyn jasandy intellektke ikemdelgen jańa kadrlar basýy múmkin, dep habarlaidy Dalanews.kz.
Qazaq Expert Club sarapshysy, HR salasynyń mamany Arman Shoqparovtyń aitýynsha, ózgeris eń aldymen kúndelikti qaitalanatyn jumystarǵa táýeldi salalarda baiqalady. Qaýip aimaǵynda bastapqy deńgeidegi IT-mamandar, koll-ortalyq qyzmetkerleri, keńse ákimshileri, bank analitikteri men qujatqa táýeldi zańgerler tur.
Sarapshynyń baǵalaýynsha, kompaniialar jappai qysqartýǵa barmaýy múmkin, alaida jańa shtat ashýdy toqtatady. Sonyń saldarynan aldaǵy 2–3 jylda kóptegen uiymdarda qyzmetkerler sany 20–35 paiyzǵa deiin qysqarýy yqtimal.
Sonymen qatar eńbek naryǵynda jańa suranys qalyptasyp keledi. Qazaqstandaǵy iri kompaniialardyń IT jáne digital bólim basshylary arasynda júrgizilgen saýalnama nátijesine sáikes, basshylardyń 97 paiyzy aldaǵy jyldary jasandy intellekt salasyndaǵy mamandarǵa qajettilik artady dep esepteidi. Eń suranystaǵy baǵyttar qatarynda derekter injeneri, mashinalyq oqytý injeneri jáne data-analitik bar.
Búginde kompaniialardyń shamamen 85% JI kadrlarynyń jetispeýshiligin sezinip otyr. Alaida bilim berý júiesi bul qarqynǵa ilese almai keledi. Saýalnamaǵa qatysqan uiymdardyń 40 paiyzy sapaly oqý baǵdarlamalarynyń joqtyǵyn basty kedergi dep sanaidy, al 62 paiyzy qyzmetkerlerin óz ishinde nemese ashyq onlain resýrstar arqyly oqytýǵa májbúr.
Mamandardyń pikirinshe, adamdy tolyq almastyrý múmkin emes salalar bar. Bular fizikalyq eńbekke negizdelgen baǵyttar, sondai-aq kásibi paiym men joǵary jaýapkershilikti talap etetin salalar. Olarǵa logistika, kólik, aýdit, komplaens jáne sot júiesi jatady.
Sarapshylar qarapaiym azamattarǵa jasandy intellektpen jumys isteýdi qazirden úirenýge keńes beredi. ChatGPT, Gemini, Perplexity siiaqty quraldardy kúndelikti qoldaný daǵdyǵa ainalýy tiis.
Arman Shoqparovtyń sózinshe, búgingi basty artyqshylyq durys suraq qoia bilý qabiletinde. Jasandy intellektpen til tabysqan adam eńbek naryǵynda utylmaidy.
