الداعى بىرنەشە جىلدا قازاقستاندا مىڭداعان ماماندىق ماڭىزىن جوعالتىپ، ولاردىڭ ورنىن جاساندى ينتەللەكتكە يكەمدەلگەن جاڭا كادرلار باسۋى مۇمكىن، دەپ حابارلايدى Dalanews.kz.

Qazaq Expert Club ساراپشىسى، HR سالاسىنىڭ مامانى ارمان شوقپاروۆتىڭ ايتۋىنشا، وزگەرىس ەڭ الدىمەن كۇندەلىكتى قايتالاناتىن جۇمىستارعا تاۋەلدى سالالاردا بايقالادى. ءقاۋىپ ايماعىندا باستاپقى دەڭگەيدەگى IT-ماماندار، كولل-ورتالىق قىزمەتكەرلەرى، كەڭسە اكىمشىلەرى، بانك اناليتيكتەرى مەن قۇجاتقا تاۋەلدى زاڭگەرلەر تۇر.

ساراپشىنىڭ باعالاۋىنشا، كومپانيالار جاپپاي قىسقارتۋعا بارماۋى مۇمكىن، الايدا جاڭا شتات اشۋدى توقتاتادى. سونىڭ سالدارىنان الداعى 2–3 جىلدا كوپتەگەن ۇيىمداردا قىزمەتكەرلەر سانى 20–35 پايىزعا دەيىن قىسقارۋى ىقتيمال.

سونىمەن قاتار ەڭبەك نارىعىندا جاڭا سۇرانىس قالىپتاسىپ كەلەدى. قازاقستانداعى ءىرى كومپانيالاردىڭ IT جانە digital ءبولىم باسشىلارى اراسىندا جۇرگىزىلگەن ساۋالناما ناتيجەسىنە سايكەس، باسشىلاردىڭ 97 پايىزى الداعى جىلدارى جاساندى ينتەللەكت سالاسىنداعى ماماندارعا قاجەتتىلىك ارتادى دەپ ەسەپتەيدى. ەڭ سۇرانىستاعى باعىتتار قاتارىندا دەرەكتەر ينجەنەرى، ماشينالىق وقىتۋ ينجەنەرى جانە data-اناليتيك بار.

بۇگىندە كومپانيالاردىڭ شامامەن 85% جي كادرلارىنىڭ جەتىسپەۋشىلىگىن سەزىنىپ وتىر. الايدا ءبىلىم بەرۋ جۇيەسى بۇل قارقىنعا ىلەسە الماي كەلەدى. ساۋالناماعا قاتىسقان ۇيىمداردىڭ 40 پايىزى ساپالى وقۋ باعدارلامالارىنىڭ جوقتىعىن باستى كەدەرگى دەپ سانايدى، ال 62 پايىزى قىزمەتكەرلەرىن ءوز ىشىندە نەمەسە اشىق ونلاين رەسۋرستار ارقىلى وقىتۋعا ءماجبۇر.

مامانداردىڭ پىكىرىنشە، ادامدى تولىق الماستىرۋ مۇمكىن ەمەس سالالار بار. بۇلار فيزيكالىق ەڭبەككە نەگىزدەلگەن باعىتتار، سونداي-اق كاسىبي پايىم مەن جوعارى جاۋاپكەرشىلىكتى تالاپ ەتەتىن سالالار. ولارعا لوگيستيكا، كولىك، اۋديت، كومپلاەنس جانە سوت جۇيەسى جاتادى.

ساراپشىلار قاراپايىم ازاماتتارعا جاساندى ينتەللەكتپەن جۇمىس ىستەۋدى قازىردەن ۇيرەنۋگە كەڭەس بەرەدى. ChatGPT، Gemini، Perplexity سياقتى قۇرالداردى كۇندەلىكتى قولدانۋ داعدىعا اينالۋى ءتيىس.

ارمان شوقپاروۆتىڭ سوزىنشە، بۇگىنگى باستى ارتىقشىلىق دۇرىس سۇراق قويا ءبىلۋ قابىلەتىندە. جاساندى ينتەللەكتپەن ءتىل تابىسقان ادام ەڭبەك نارىعىندا ۇتىلمايدى.