Mundai nátijege qujattarǵa qol qoiýshylardy qysqartý jáne keibir qyzmetkerlerdi memlekettik qyzmet kórsetý protsesinen shyǵarý arqyly qol jetkizildi. Bul jumysty Eńbek jáne halyqty áleýmettik qorǵaý ministrligi qyzmet kórsetý protsesterin transformatsiialaý jáne reinjiniring sheńberinde qol jetkizgen.
Máselen, 2022 jyldyń sońynan bastap 2023 jyldyń basyna deiin 3 memlekettik qyzmet avtomattandyryldy: «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kópbalaly analarǵa memlekettik járdemaqy taǵaiyndaý, múgedektigi boiynsha memlekettik áleýmettik járdemaqy taǵaiyndaý jáne jerleýge birjolǵy tólem taǵaiyndaý.
Atalǵan qyzmetterde adam faktory tolyǵymen alynyp, avtomatty túrde taǵaiyndala bastaldy.
Osylaisha, qyzmet alýshylarǵa proaktivti formatta qyzmetti alý múmkindigi týraly SMS-habarlama jiberilip, oǵan jaýap alǵan kezde aqparattyq júie adamnyń qatysýynsyz shamamen 1 kún ishinde járdemaqy taǵaiyndaý týraly sheshim qabyldaidy.
Buryn járdemaqy taǵaiyndaý týraly sheshim qabyldaýǵa 7 adam qatysyp, úrdis 8 jumys kúnine deiin sozylatyn.
Sonymen qatar, bala týýǵa jáne bala kútimine arnalǵan járdemaqy, júktilikke jáne bosanýǵa bailanysty tabysynan aiyrylǵan jaǵdaida beriletin áleýmettik tólem, sondai-aq bala bir jarym jasqa tolǵannan keiin onyń kútimine bailanysty tabysynan aiyrylǵan jaǵdaida taǵaiyndalatyn áleýmettik tólem boiynsha ótinishterdi qaraý tártibi jeńildetildi.
Ońtailandyrý aiasynda «Azamattarǵa arnalǵan úkimet» memlekettik korporatsiiasy» KEAQ mamandarynyń osy protseske qatysýy alynyp tastalyp, bul qyzmet kórsetý merzimi 8 kúnnen 4 jumys kúnine deiin qysqartyldy.
2023 jyldyń sońyna deiin osyndai tártippen kórsetiletin qyzmetterdiń taǵy 4 túri boiynsha ótinishterdi qaraý merzimin qysqartý josparlanýda. Olar: kópbalaly otbasyna járdemaqy taǵaiyndaý; eńbek etý qabiletinen aiyrylǵan jaǵdaidaǵy áleýmettik tólem; asyraýshysynan aiyrylǵan jaǵdaidaǵy áleýmettik tólem; birinshi, ekinshi jáne úshinshi toptaǵy múgedektigi bar adamdarǵa arnaýly memlekettik járdemaqy.
