مۇنداي ناتيجەگە قۇجاتتارعا قول قويۋشىلاردى قىسقارتۋ جانە كەيبىر قىزمەتكەرلەردى مەملەكەتتىك قىزمەت كورسەتۋ پروسەسىنەن شىعارۋ ارقىلى قول جەتكىزىلدى. بۇل جۇمىستى ەڭبەك جانە حالىقتى الەۋمەتتىك قورعاۋ مينيسترلىگى قىزمەت كورسەتۋ پروسەستەرىن ترانسفورماسيالاۋ جانە رەينجينيرينگ شەڭبەرىندە قول جەتكىزگەن.
ماسەلەن، 2022 جىلدىڭ سوڭىنان باستاپ 2023 جىلدىڭ باسىنا دەيىن 3 مەملەكەتتىك قىزمەت اۆتوماتتاندىرىلدى: «التىن القا»، «كۇمىس القا» القالارىمەن ناگرادتالعان نەمەسە بۇرىن «باتىر انا» اتاعىن العان، I جانە II دارەجەلى «انا داڭقى» وردەندەرىمەن ناگرادتالعان كوپبالالى انالارعا مەملەكەتتىك جاردەماقى تاعايىنداۋ، مۇگەدەكتىگى بويىنشا مەملەكەتتىك الەۋمەتتىك جاردەماقى تاعايىنداۋ جانە جەرلەۋگە ءبىرجولعى تولەم تاعايىنداۋ.
اتالعان قىزمەتتەردە ادام فاكتورى تولىعىمەن الىنىپ، اۆتوماتتى تۇردە تاعايىندالا باستالدى.
وسىلايشا، قىزمەت الۋشىلارعا پرواكتيۆتى فورماتتا قىزمەتتى الۋ مۇمكىندىگى تۋرالى SMS-حابارلاما جىبەرىلىپ، وعان جاۋاپ العان كەزدە اقپاراتتىق جۇيە ادامنىڭ قاتىسۋىنسىز شامامەن 1 كۇن ىشىندە جاردەماقى تاعايىنداۋ تۋرالى شەشىم قابىلدايدى.
بۇرىن جاردەماقى تاعايىنداۋ تۋرالى شەشىم قابىلداۋعا 7 ادام قاتىسىپ، ءۇردىس 8 جۇمىس كۇنىنە دەيىن سوزىلاتىن.
سونىمەن قاتار، بالا تۋۋعا جانە بالا كۇتىمىنە ارنالعان جاردەماقى، جۇكتىلىككە جانە بوسانۋعا بايلانىستى تابىسىنان ايىرىلعان جاعدايدا بەرىلەتىن الەۋمەتتىك تولەم، سونداي-اق بالا ءبىر جارىم جاسقا تولعاننان كەيىن ونىڭ كۇتىمىنە بايلانىستى تابىسىنان ايىرىلعان جاعدايدا تاعايىندالاتىن الەۋمەتتىك تولەم بويىنشا وتىنىشتەردى قاراۋ ءتارتىبى جەڭىلدەتىلدى.
وڭتايلاندىرۋ اياسىندا «ازاماتتارعا ارنالعان ۇكىمەت» مەملەكەتتىك كورپوراسياسى» كەاق ماماندارىنىڭ وسى پروسەسكە قاتىسۋى الىنىپ تاستالىپ، بۇل قىزمەت كورسەتۋ مەرزىمى 8 كۇننەن 4 جۇمىس كۇنىنە دەيىن قىسقارتىلدى.
2023 جىلدىڭ سوڭىنا دەيىن وسىنداي تارتىپپەن كورسەتىلەتىن قىزمەتتەردىڭ تاعى 4 ءتۇرى بويىنشا وتىنىشتەردى قاراۋ مەرزىمىن قىسقارتۋ جوسپارلانۋدا. ولار: كوپبالالى وتباسىنا جاردەماقى تاعايىنداۋ؛ ەڭبەك ەتۋ قابىلەتىنەن ايىرىلعان جاعدايداعى الەۋمەتتىك تولەم؛ اسىراۋشىسىنان ايىرىلعان جاعدايداعى الەۋمەتتىك تولەم؛ ءبىرىنشى، ەكىنشى جانە ءۇشىنشى توپتاعى مۇگەدەكتىگى بار ادامدارعا ارناۋلى مەملەكەتتىك جاردەماقى.
