Qazaqstannyń Eńbek jáne halyqty áleýmettik qorǵaý ministrligi elge qonys aýdarýdy josparlap júrgen azamattarǵa eskertý jasady. Vedomstvo qujat rásimdeý kezinde qyzmetin usynatyn kúmándi deldaldarǵa aqsha bermeýge shaqyrdy, dep habarlaidy dalanews.kz.
Ministrliktiń málimetinshe, Kóshi-qon komitetine memlekettik qyzmetterdi aqyly túrde jedeldetýge ýáde beretin adamdarǵa qatysty ótinishter túsip jatyr. Olar qujattardy tez rásimdeýge, testileýden ótýge kómektesýge jáne tiisti organdardyń sheshimine yqpal etýge bolatynyn aityp, azamattardyń senimine kirýge tyrysady.
Vedomstvo mundai ýádelerdiń shyndyqqa janaspaitynyn málimdedi.
"Qazaqstanǵa qonys aýdarý, qujattardy rásimdeý jáne beiimdelý – mańyzdy kezeń. Sondyqtan tek resmi aqparatqa súiený óte mańyzdy. Kóshi-qon komitetine qujattardy rásimdeýdi aqyly túrde jedeldetýge, testileýden ótýge kómektesýge nemese memlekettik qyzmetterdi alýǵa yqpal etýge ýáde beretin deldaldar týraly ótinishter túsip jatyr", – delingen habarlamada.
Ministrlik mundai adamdardyń ýádesine senbeýge jáne olarǵa aqsha bermeýge keńes berdi. Vedomstvo testileýdiń nemese qujattardy qaraýdyń nátijesin aqy tólep ózgertý múmkin emes ekenin atap ótti.
«Resmi túrde eskertemiz: mundai ýádelerge senbeńizder. Bul baǵyttaǵy memlekettik qyzmetter belgilengen tártippen kórsetiledi. Testileý nátijelerin nemese qujattardy qaraý qorytyndysyn qandai da bir aqy úshin ózgertýge bolmaidy. Eń bastysy, beitanys deldaldarǵa aqsha bermeńizder jáne tek resmi aqparatqa júginińizder», – dep eskertti ministrlik.
