Túrkimenstan parlamenti "Eńbegi sińgen ıt asyraýshy" jáne "Halyqtyq ıt asyraýshy" degen qurmetti ataqtarmen marapattaý jóninde zań jobasyn qabyldady, – dep habarlaıdy Dalanews.kz Azattyqtyń túrkimen qyzmetine silteme jasap.

Depýtattar bul ataqtardy el prezıdenti Gýrbangýly Berdymýhammedovtiń "ulttyq tarıhı-mádenı murany saqtaý jáne nasıhattaý" tapsyrmasymen baılanystyrady. Prezıdent ıt asyraýshylarǵa beriletin medaldyń tanym belgilerin jeke ózi qaraǵan.

Túrkimenstandaǵy memlekettik medıa memleket basshysyn alabaı tuqymdas ıtti jaqsy bilýshi retinde nasıhattaýdy jalǵastyryp jatyr. Berdymýhamedov olar jaıynda kitaptar da jazǵan, óleń, án de arnaǵan.

Byltyr 10 qarashada Ashǵabadta alabaı ıtine altyn jalatqan eskertkish ashyldy. Prezıdenttiń uly túrkimen alabaı qaýymdastyǵyn basqarady.

Biraq jergilikti bılik ıesiz ıtter men mysyqtardyń kózin joıýdy jalǵastyryp jatyr.