Senat damý deńgeii ártúrli elderdiń erekshelikterin eskeretin Eń tómengi jalaqy týraly konventsiiany maquldady. Endi eń tómengi eńbekaqyny esepteý kezinde memleket ekonomikalyq jaǵdai men jumyskerlerdiń naqty qajettilikterin eskerýge mindetti bolady, dep habarlaidy Dalanews.kz.
Senator Ásem Rahmetovanyń aitýynsha, endi eń tómengi jalaqyny (ETJ) anyqtaý kezinde úsh negizgi faktor eskeriledi:
- jumyskerlerdiń qajettilikteri;
- ómir súrý quny;
- eldegi ekonomikalyq jaǵdai.
– Eń tómengi jalaqy mólsherin úkimet belgileidi. Biraq bul úderis tek memlekettik organdardyń ǵana emes, jumysshylar men jumys berýshiler ókilderiniń qatysýymen júrýi tiis, – dedi ol.
Senatordyń aitýynsha, belgilengen eń tómengi jalaqy mindetti túrde oryndalýy kerek, al ony buzǵandarǵa jaýapkershilik qarastyrylǵan.
– Mundai tásil áleýmettik ádildik pen ekonomikalyq negizdiliktiń tepe-teńdigin saqtaýǵa múmkindik beredi, – dep túsindirdi Rahmetova.
Senat tóraǵasy Maýlen Áshimbaev jańa konventsiianyń eń mańyzdy ereksheligi – ekonomikalyq kórsetkishterden góri naqty adamnyń, iaǵni jumyskerdiń ómirlik qajettilikterine nazar aýdarý ekenin atap ótti.
– Konventsiiada eń tómengi jalaqyny anyqtaý kezinde eńbek ónimdiligi men ekonomikadaǵy mediandyq jalaqyny eskerý qajet delingen. Biraq sonymen qatar jumyskerlerdiń ómir súrý deńgeii men negizgi qajettilikterin de nazarǵa alý kerek. Osylaisha, qujat makroekonomikalyq kórsetkishterden góri naqty adamnyń turmys sapasyna basymdyq beredi, – dedi Áshimbaev.
Qazir eń tómengi jalaqy qandai?
Maýlen Áshimbaevtyń málimetinshe, qazirgi tańda Qazaqstanda eń tómengi jalaqy mólsheri 85 myń teńge. Bul — eldegi mediandyq jalaqynyń 30 paiyzyna jáne ortasha jalaqynyń 21 paiyzyna teń.
Jańa esepteý tásili kúshine engen soń, eń tómengi jalaqyny belgileý kezinde jumysshynyń kúnkóris deńgeii men naqty qajettilikteri basty ólshemge ainalmaq.
