Prezidenttiń keńesshisi - baspasóz hatshysy Berik Ýáli Memleket basshysynyń Kievte Aidos Sadyqovqa jasalǵan shabýylǵa qatysty málimdemesine, sondai-aq, jábirlenýshiniń áieli Natalia Sadyqovanyń tujyrymyna qatys túsinik berdi, - dep habarlaidy Dalanews.kz Tengrinews.kz-ke siltep.
Berik Ýáli Natalia Sadyqovanyń "Bizdiń arna Prezident úshin kózge shyqqan súieldei boldy" degen pikirine qatysty túsinik berdi.
"Qaidaǵy súiel? Memleket basshysy bul internet resýrsty qaramaidy, tipti oǵan eshqashan qyzyǵýshylyq tanytqan da emes. Qazaqstanda ártúrli baǵytta ondaǵan, tipti júzdegen mundai arna, saittar jumys isteidi. Bári óz qyzmetterin atqaryp jatyr. Al atalǵan arnanyń eshqashan elimizdiń ishki aqparattyq máselelerine aitarlyqtai áseri bolǵan joq. Oǵan qosa, kóp adam ondai aqparat kóziniń bar ekenin Kievte bolǵan oqys oqiǵadan keiin ǵana bildi", - dedi ol.
Prezidenttiń baspasóz hatshysynyń paiymdaýynsha, "Qazaqstanǵa taǵylǵan jalǵan aiypty ýshyqtyrýdy, elimizdiń strategiialyq baǵytyn, sonyń ishinde syrtqy saiasatqa qatysty ustanymyn ózgertý úshin qysym jasaýdy kózdeitin kúshter bar siiaqty".
Berik Ýálidiń sózinshe, qylmys Ýkraina aýmaǵynda jasalǵandyqtan, tergeýdi sol eldiń tiisti qurylymdary júrgizedi.
"Memleket basshysynyń tapsyrmasy boiynsha bizdiń quqyq qorǵaý organdary belgilengen rásimderge sáikes qosymsha aqparat alý úshin Ýkraina tarapyna suratý joldaidy, qajet bolǵan jaǵdaida járdem berý úshin tergeý jumysyna qatysa alady. Aidos Sadyqovqa buǵan deiin taǵylǵan aiyptarǵa qaramastan, ol – eń aldymen, Qazaqstan azamaty. Sáikesinshe, ol jáne onyń otbasy ózderiniń tiisti quqyqtaryn paidalana alady. Konstitýtsiiaǵa sáikes olar el aýmaǵynan tys jerlerde memlekettiń qorǵaýynda jáne qamqorlyǵynda bolady. Sondyqtan Prezident Qasym-Jomart Toqaev Sadyqovtar otbasyna, eger olar kelisim berse, barlyq qajetti kómek kórsetýdi tiisti memlekettik jáne diplomatiialyq qyzmetterge tapsyrdy", - dedi Berik Ýáli.
Aita keteiik, Aidos Sadyqov Ýkrainada resmi bosqyn mártebesin alǵan. 2023 jyldyń qazan aiynda Sadyqovqa Qazaqstanda "áleýmettik, ulttyq, rýlyq, tektik-toptyq nemese dini alaýyzdyqty qozdyrǵany" úshin izdeý jariialanǵan bolatyn.
Biyl 18 maýsymda Kievte Aidos Sadyqovqa qastandyq jasaldy.
