پرەزيدەنتتىڭ كەڭەسشىسى - باسپا ءسوز حاتشىسى بەرىك ءۋالي مەملەكەت باسشىسىنىڭ كييەۆتە ايدوس سادىقوۆقا جاسالعان شابۋىلعا قاتىستى مالىمدەمەسىنە، سونداي-اق، جابىرلەنۋشىنىڭ ايەلى ناتاليا سادىقوۆانىڭ تۇجىرىمىنا قاتىس تۇسىنىك بەردى، - دەپ حابارلايدى Dalanews.kz Tengrinews.kz-كە سىلتەپ.
بەرىك ءۋالي ناتاليا سادىقوۆانىڭ "ءبىزدىڭ ارنا پرەزيدەنت ءۇشىن كوزگە شىققان سۇيەلدەي بولدى" دەگەن پىكىرىنە قاتىستى تۇسىنىك بەردى.
"قايداعى سۇيەل؟ مەملەكەت باسشىسى بۇل ينتەرنەت رەسۋرستى قارامايدى، ءتىپتى وعان ەشقاشان قىزىعۋشىلىق تانىتقان دا ەمەس. قازاقستاندا ءارتۇرلى باعىتتا ونداعان، ءتىپتى جۇزدەگەن مۇنداي ارنا، سايتتار جۇمىس ىستەيدى. ءبارى ءوز قىزمەتتەرىن اتقارىپ جاتىر. ال اتالعان ارنانىڭ ەشقاشان ەلىمىزدىڭ ىشكى اقپاراتتىق ماسەلەلەرىنە ايتارلىقتاي اسەرى بولعان جوق. وعان قوسا، كوپ ادام ونداي اقپارات كوزىنىڭ بار ەكەنىن كييەۆتە بولعان وقىس وقيعادان كەيىن عانا ءبىلدى"، - دەدى ول.
پرەزيدەنتتىڭ باسپا ءسوز حاتشىسىنىڭ پايىمداۋىنشا، "قازاقستانعا تاعىلعان جالعان ايىپتى ۋشىقتىرۋدى، ەلىمىزدىڭ ستراتەگيالىق باعىتىن، سونىڭ ىشىندە سىرتقى ساياساتقا قاتىستى ۇستانىمىن وزگەرتۋ ءۇشىن قىسىم جاساۋدى كوزدەيتىن كۇشتەر بار سياقتى".
بەرىك ءۋاليدىڭ سوزىنشە، قىلمىس ۋكراينا اۋماعىندا جاسالعاندىقتان، تەرگەۋدى سول ەلدىڭ ءتيىستى قۇرىلىمدارى جۇرگىزەدى.
"مەملەكەت باسشىسىنىڭ تاپسىرماسى بويىنشا ءبىزدىڭ قۇقىق قورعاۋ ورگاندارى بەلگىلەنگەن راسىمدەرگە سايكەس قوسىمشا اقپارات الۋ ءۇشىن ۋكراينا تاراپىنا سۇراتۋ جولدايدى، قاجەت بولعان جاعدايدا جاردەم بەرۋ ءۇشىن تەرگەۋ جۇمىسىنا قاتىسا الادى. ايدوس سادىقوۆقا بۇعان دەيىن تاعىلعان ايىپتارعا قاراماستان، ول – ەڭ الدىمەن، قازاقستان ازاماتى. سايكەسىنشە، ول جانە ونىڭ وتباسى وزدەرىنىڭ ءتيىستى قۇقىقتارىن پايدالانا الادى. كونستيتۋسياعا سايكەس ولار ەل اۋماعىنان تىس جەرلەردە مەملەكەتتىڭ قورعاۋىندا جانە قامقورلىعىندا بولادى. سوندىقتان پرەزيدەنت قاسىم-جومارت توقايەۆ سادىقوۆتار وتباسىنا، ەگەر ولار كەلىسىم بەرسە، بارلىق قاجەتتى كومەك كورسەتۋدى ءتيىستى مەملەكەتتىك جانە ديپلوماتيالىق قىزمەتتەرگە تاپسىردى"، - دەدى بەرىك ءۋالي.
ايتا كەتەيىك، ايدوس سادىقوۆ ۋكراينادا رەسمي بوسقىن مارتەبەسىن العان. 2023 جىلدىڭ قازان ايىندا سادىقوۆقا قازاقستاندا "الەۋمەتتىك، ۇلتتىق، رۋلىق، تەكتىك-توپتىق نەمەسە ءدىني الاۋىزدىقتى قوزدىرعانى" ءۇشىن ىزدەۋ جاريالانعان بولاتىن.
بيىل 18 ماۋسىمدا كييەۆتە ايدوس سادىقوۆقا قاستاندىق جاسالدى.
