Bul memlekettik mekeme, birinshiden, jol qaýipsizdigin uiymdastyrýǵa jaýapty. Ekinshiden, jolaýshy tasymaldaýdy uiymdastyrýmen ainalysady, al úshinshiden, elordadaǵy joldar men kólik nysandaryn salý baǵytynda eńbek etedi. Nátijeler de joq emes, oń dúnielerdi kún saiyn elorda kóshelerinen baiqap, kórip júrmiz.
«Jolaýshylar tasymaly salasyna toqtalatyn bolsaq, búginde biz elordada on jańa baǵytty iske qostyq, qoǵamdyq kólik baǵyttarynyń 20-dan astam shemasyn ońtailandyrdyq. Ortasha jol jóndeý, iaǵni kóshe joldary jelisiniń jai-kúiin saqtaý aiasynda 250-ge jýyq kósheni jóndep, jalpy uzyndyǵy 150 shaqyrymdy quraityn 14 jańa kóshe saldyq. Aǵymdaǵy jylǵa da jumys jospary jasaldy. Máselen, biyl qalanyń taǵy 100-ge jýyq kóshesin óńdep, 14 nysan boiynsha jumysty jalǵastyrýdy josparlap otyrmyz, onyń 7-ýi kúrdeli qurylys aiasynda tolyǵymen aiaqtalady», - dep málimdedi basqarmasy basshysy Jansultan Saparbaev.
Ol elordanyń jol tósemin jóndeý jumystary qanshalyqty jii júrgiziletinin de atap ótti. Kóp nárse jol qurylysy materialdarynyń sapasyna, jumys kúshi men tehnikaǵa bailanysty. Biyl elordada alǵash ret jańa tehnologiialar qoldanylyp jatyr. Olar joldardy buzylýdan qorǵaidy jáne ýchaskelerdegi jóndeý sanyn azaitatyn qorǵanys qabatyn qoiýǵa kómektesedi.
«Oniks» ádisimen elordanyń Ortalyq saiabaǵyna shańǵy rolikti jolyn, al «Komsomolskii» turǵyn úi keshenindegi «mikroserfeis» tehnologiiasyn qoldana otyryp, Domalaq ana kóshesin tósedik. Alaida, sońǵy kezderi jóndelip bitken Qabanbai batyr dańǵylynyń boiynda jańa tehnologiialar qoldanylǵan joq. Óitkeni, bul ýchaskeniń jóndeý jumystary ortasha jóndeý aiasynda júrgizildi», - dep túsindirdi jaýapty maman.
Osy jyly ǵana Uly Dala dańǵylyndaǵy kópir paidalanýǵa berildi. Bul nysan Esildiń qos qaptalyn júrgizýshilerge birshama jaqyndatqanyn moiyndaýǵa tiispiz. Qazir Alash tas joly kópirine asfalt tóseý jumystary júrgizilip jatyr. Táýelsizdik kópirine keletin bolsaq, qazirgi ýaqytta kópirlerge jaqyn jerlerge topyraq toltyrý, nysandy betondaý jumystary júrip jatyr. Qurylys 2023 jyly aiaqtalatyn kórinedi.
Jansultan Berdibekuly azamattar arasynda talqylanatyn taǵy bir taqyryp – elorda joldaryndaǵy kólik turaqtary týraly áńgimeledi. «Astana Parking Space» JShS-men jasalǵan kelisimge sáikes, qazir Astana qalasynda 5 myńnan astam aqyly avtoturaq bar. Alaida, olar «Altyn alqa», «Kúmis alqa» tósbelgileriniń ieleri, Semei iadrolyq synaq poligonyndaǵy synaqtardan zardap shekkender, barlyq sanattaǵy ardagerler, múgedek balalardyń ata-analary men qamqorshylary úshin tegin.
Sonymen qatar, bul aýmaqtarda aqyly kúndelikti jazylymdar jumys isteidi, olar kúndizgi ýaqytta kólikterdi aqyly turaq ornatylǵan qalanyń ártúrli bólikterinde qaldyrýǵa múmkindik beredi. Sondai-aq demalys, mereke jáne jumys kúnderi saǵat 19.00-den tańǵy 7-ge deiin júrgizýshiler úshin aqysyz qyzmet etedi.
«Aqyly turaqtardan túsken qarjynyń basym bóligi elorda biýdjetine túsedi. Seriktespen jasalǵan kelisimge sáikes, ol tabystyń az bóligin alýǵa quqyly. Sebebi, jeke avtoturaqtardy ustaýǵa ketetin barlyq shyǵyndardy memlekettik-jekeshelik áriptestik aiasynda kóteremiz. Tólemderdiń barlyǵy beinetúsirilim arqyly jazylady, ony da seriktesimiz – «Astana Parking Space» JShS júrgizip jatyr», - dep atap ótti basqarma basshysy.
Jansultan Saparbaevtyń sózinshe, elordanyń qala mańyndaǵy 35 eldi mekeni 25 marshrýtpen qamtamasyz etilgen. Bul baǵyttarǵa Astana qalasynyń 1-shi kommýnaldyq kólikter parki jaýapty. Alaida, elordada jolaýshylar tasymaldaityn jyljymaly quram áli de tapshy. Jergilikti ákimdik jeke investorlarmen kelissózder júrgizip jatyr, olar óz qarajattary esebinen qalaǵa taǵy 100 elektrobýs ákeledi, bul, árine, elordadaǵy avtobýstardyń jaǵdaiyn jaqsarta túsedi degen sóz. Bul jańalyq óz tiimdiligin kórsetetini de aqiqat. Birinshiden, ol elektrobýstar qorshaǵan ortaǵa emissiialardy azaitady, ekinshiden, klimattyq baqylaýmen jáne múgedekterge arnalǵan pandýstarmen jabdyqtalǵan. Bir elektrobýstyń syiymdylyǵy 50 orynnan sál asady.
Jaýapty maman elektrobýstardyń klimattyq baqylaýy týraly tolyǵyraq toqtaldy. Óitkeni, jolaýshylar tarapynan №50, 70-shi baǵyttardyń jaǵdaiy óte nashar ekeni aitylady, adamdar jazda salonda ysyp, qysta tońyp qalady.
«Iá, durys aitasyz, biz bul qolaisyzdyqtardy bilemiz. Biz bul másele boiynsha jumys istep jatyrmyz. №70 baǵytqa qatysty: osy baǵytqa qyzmet kórsetetin «Jorǵa» JShS biyl óz avtoparkine jańa avtobýstar alýdy josparlap otyr.
Taǵy bir ózekti másele – LRT qurylysyn odan ári jalǵastyrý. Biz qala turǵyndary arasynda saýalnama júrgizdik, oǵan sáikes respondentterdiń 50 paiyzdan astamy LRT qurylysyna daýys berdi. Sondai-aq, elordanyń óte jyldam ósip, damyp kele jatqanyn atap ótken jón. 2030 jylǵa qarai qala halqynyń sany 2 million adamnan asýy tiis. Tiisinshe, meniń oiymsha, qalamyzǵa jelilik kólik qajet. Qazir bul máseleni qarjylandyrý máselesi qarastyrylýda. Birshama sheshildi desek te bolady. Demek, bul zamanaýi kólik túriniń de igiligin astanalyqtar kóretin kún alys», - dedi Jansultan Berdibek uly.
