"Keshe elordada 1500-den astam adam koronavirýs indetine shaldyqty. Bul óte joǵary kórsetkish. Odan bólek, 2245 adam statsionarlyq emdi talap etedi, qazir olar aýrýhanada jatyr. Jáne 8 myńnan astam naýqas emhanada jáne 201 adam reanimatsiiada em alýda.
Ókinishke qarai, ólim jaǵdaiy da joq emes, kúnine 15 naýqas atalǵan indetten mert bolýda. Búginde densaýlyq saqtaý salasy qiyn sátti bastan keshýde, árine, biz óz kezegimizde bar kúsh-jigerimizdi jumsaimyz. Statistika kórsetip otyrǵandai qazir qaladaǵy indettiń qarqyny ótken jylǵy jazǵy jaǵdaidy qaitalap otyr, tipti odan da joǵary bolmasa tómen emes.
Bar-joǵy 2-3 kúnniń ishinde koronavirýs juqtyrýshylardyń qarqyny kúrt ósti. Kórsetkish demalys kúnderi Býrabaida demalyp kelgen turǵyndardyń esebinen joǵary bolyp otyr. Demalys kezinde astanalyqtardyń Býrabaiǵa aǵylǵanyn bárińiz baiqadyńyzdar", – dedi Timýr Muratov Instragramdaǵy tikelei efirde.
Sondai-aq T.Muratov lokdaýn engizilýi múmkin ekenin aitty.
"Lokdaýn máselesi búginde bárin tolǵandyryp otyr. Árine, qiyn jaǵdai, biraq bári ózimizge bailanysty. Eger biz jeke bas qaýipsizdigin aldyńǵy orynǵa qoisaq, jaǵdai ózgeredi. Qarapaiym ǵana betperde taǵý, araqashyqtyq saqtaý, kópshilik jinalatyn orynǵa barmaý degen sekildi qiǵadalardy saqtasaq jetip jatyr. Sondai-aq, árine, vaktsina alý da mańyzdy.
Virýstyń qol-aiaǵy joq ony taratyp, juqtyratyn ózimiz. Iaǵni saqtansaq, indetke shaldyǵýshylardyń sany azaiady, tiisinshe lokdaýn engizý máselesi de joiylady.
Al indettik jaǵdai údeleýin toqtatpasa, onda qosyshma shara qabyldaýǵa týra keledi. Sebebi qanshama jan aýyryp, odan qaldy mert bolyp jatqanda, shuǵyl ári ońtaily sheshim qabyldaý talap etiledi", – dedi Timýr Muratov Instragramdaǵy tikelei efirde.
Basqarma basshysy indet órshi túsken jaǵdaida qosymsha gospital ashyp, tósek-jailardyń sanyn arttyryp, sol siiaqty qajetti qural-jabdyqtar men dári-dármekpen qamtylatynyn aitty.
"Aýrýmen kúreste mamandar máselesin de umytpaǵan jón. Qazirgi ýaqytta elordada 6 myńnan astam dáriger men medbike indetpen kúresip jatyr. Jalpy qalada 21 myń meditsina qyzmetkeri eńbek etip jatyr. Jaǵdai nasharlai tússe, indetpen kúreske qosymsha mamandar tartatyn bolamyz, onyń ústine koronavirýstan basqa da aýrýdan emdelip jatqan jandar bar", – deidi ol.
