Ulttyq statısıka búrosy departamentiniń qyzmetkerleri, ıntervúerler, eriktiler býkletter taratyp, suraqtarǵa jaýap berdi, planshetter arqyly qalaı tirkelýge bolatynyn kórsetip, onlaın sanaqtan ótýge tilek bildirýshilerdiń barlyǵyna kómektesti.
– Halyq sanaǵy qajetti jumys oryndaryn qurý, eńbek resýrstaryna taldaý jasaý, balabaqshalarda, áleýmettik mekemelerde oryndar qurý jáne memlekettik baǵdarlamalardy ázirleý úshin elimizdiń demografıalyq kórinisin kórýge múmkindik beredi. Búgingi tańda elordanyń 600 myńnan astam turǵyny halyq sanaǵynan ótti, – dep atap ótti Nur-Sultan qalasy boıynsha Ulttyq statısıka búrosy departamentiniń bas mamany Aıbek Qalıev.
Elorda turǵyndary halyq sanaǵyna belsendi qatysýda. Buǵan deıin elordalyq QHA, ÚEU ókilderi qala turǵyndaryn sanaq naýqanyna qatysýǵa shaqyrdy, sondaı-aq eriktiler úı-úıdi aralaý jumystaryna qosyldy. Elordada búgingi tańda shamamen 1,5 myń ıntervúer-sanaýysh halyq sanaǵynan ótýge kómektesedi.
Esterińizge sala keteıik, ıntervúerlerdiń oflaın aralaý jumystary 30 qazanǵa deıin jalǵasady.
Ulttyq statısıka búrosy onlaın sanaqtan ótkenderge ıntervúerge habarlama nómirin kórsetý qajet ekenin eske saldy. Olar qaıtadan suralmaıdy.
Intervúerlerdi sanaqtyń logotıpi bar kók tústi sharfy men sómkesi boıynsha tanýǵa bolady, budan basqa, árqaısysynda planshet jáne ıntervúer kýáligi bolýy tıis. Kýálikte kórsetilgen tirkeý nómiri boıynsha sanaq.gov.kz saıtynan ıntervúerdiń jeke basyn tekserýge bolady. Sondaı-aq, muny 1446 nómirine qońyraý shalý arqyly da jasaýǵa bolady.
Aıta keteıik, halyq sanaǵyn onlaın ótkizý múmkindigi toqtatylǵannan keıin merzimdi uzartý týraly kóptegen ótinishter kelip tústi. Osyǵan baılanysty sanaq.gov.kz saıtyndaǵy onlaın-saýalnama fýnksıasyn qaıta júkteý týraly sheshim qabyldandy.
[video width="1920" height="1080" mp4="https://dalanews.kz/wp-content/uploads/2021/10/VID-20211025-WA0003.mp4"][/video]
