Jedel medısınalyq kómek ár ýaqytta qalalyq densaýlyq saqtaý salasynyń ózegi bolyp qala bermek, óıtkeni qala turǵyndarynyń densaýlyǵy men ómirin saqtaýdyń ótkir áleýmettik máselelerin sátti sheshý tikeleı jedel járdem qyzmetine baılanysty.
Bıyl jedel járdem qyzmeti 90 jyldyǵyn atap ótýde. Bul – qyzmetkerler úshin de, elimizdiń densaýlyq saqtaý salasy úshin de aıtýly kún. Búgin Nur-Sultanda osynaý mańyzdy mereıtoıǵa oraı ǵylymı-praktıkalyq konferensıa uıymdastyryldy.
Konferensıaǵa QR Densaýlyq saqtaý vıse-mınıstri Vácheslav Dýdnık, Nur-Sultan qalasy ákiminiń orynbasary Erlan Bekmurzaev, elorda ákimdiginiń, Qoǵamdyq densaýlyq saqtaý basqarmasynyń ókilderi, sol sıaqty qalalyq medısınalyq uıymdarynyń basshylary qatysty.
İs-sharanyń erekshe qonaǵy retinde Izraıl ulttyq jedel medısınalyq járdem qyzmetiniń paramedıkterdi daıarlaý ortalyǵynyń aǵa nusqaýshysy, Safeguard Medical kompanıasynyń klınıkalyq dırektory E.E. Vershılovskıı shaqyryldy. Ol Izraıl memleketiniń jedel medısınalyq járdem qyzmetin uıymdastyrý, jappaı oqıǵalarǵa den qoıý, Izraıl jedel medısınalyq járdem qyzmetiniń doktrınasy týraly aıtyp, qan ketýdi toqtatý boıynsha sheberlik sabaǵyn ótkizdi.
Al Reseıden kelgen reanımatolog-anestezıology, Reseı Densaýlyq saqtaý mınıstrliginiń Ulttyq sanıtarıalyq avıasıa qyzmetiniń bas dárigeri A.V. Pereverensev «Júrek-ókpe reanımasıasynyń jańa tehnologıalary: bolashaqqa kózqaras» taqyrybynda baıandama jasady. Sondaı-aq, konferensıada shuǵyl medısınalyq kómek, Ulttyq akredıtteý, korporatıvtik basqarý, menejment, senimgerlik basqarý, memlekettik-jekemenshik áriptestik, medısınalyq bilim berý salasyndaǵy sarapshylar qatysty.
Konferensıa aıasynda medısınalyq tehnologıalar kórmesi uıymdastyryldy. Ozyq medısınalyq jabdyqtardy kórsetý maqsatynda otandyq jáne sheteldik medısınalyq tehnıkany óndirýshi kompanıa ókilderi qatysty.
– Barlyq jedel medısınalyq járdem mashınalary jetekshi brendterdiń (WEINMANN jáne t.b.) zamanaýı medısınalyq jabdyqtarymen jabdyqtalǵan. Olardyń tehnıkalyq súıemeldeýi bar, kásiporyn qyzmetkerlerin medısınalyq jabdyqpen jumys isteý boıynsha oqytý júıesi de engizildi, – dedi Nur-Sultan qalasy ákimdiginiń Qalalyq jedel medısınalyq járdem stansıasynyń dırektory Murat Orazbaev.
