Elordada Konstitýtsiia kúnine orai jiyn ótti
QR Prezidenti janyndaǵy Qazaqstan strategiialyq zertteýler institýty uiymdastyrǵan is-shara oflain jáne onlain formatynda boldy.
– Bas qosýymyzdyń sebebi – Qazaqstan Respýblikasynyń Konstitýtsiia kúni. Bul mańyzdy memlekettik mereke. Búgingi is-sharada Konstitýtsiiamyzdyń daiyndalýyna, onyń jańǵyrtylýyna úles qosqan elimizdiń tanymal zańgerleri, qurmetti azamattary otyr. Dóńgelek ústel ótkizýimizdiń taǵy bir sebebi – «Qasym-Jomart Toqaev. Qazaqstan Respýblikasy Prezidentiniń tańdamaly eńbekteri» kitabynyń tusaýkeseri. «CNPC International in Kazakhstan LTD» kompaniiasynyń qoldaýymen Qazaqstan-Nemis ýniversitetiniń Halyqaralyq jáne aimaqtyq yntymaqtastyq ǵylymi-zertteý institýty daiyndaǵan. Basylymnyń jaýapty redaktory – Halyqaralyq jáne aimaqtyq yntymaqtastyq ǵylymi-zertteý institýty direktory, tarih ǵylymdarynyń doktory, professor Bolat Sultanov, – dedi jiyndy ashqan Qazaqstan strategiialyq zertteýler institýtynyń direktory Zarema Sháýkenova.
Dóńgelek ústelge qatysýshylar Qazaqstandaǵy konstitýtsiialyq qurylystyń ózekti máselelerin, Qazaqstan Respýblikasynyń Tuńǵysh Prezidenti Elbasy N.Nazarbaevtyń ideialyq shabyttandyrýshy jáne Qazaqstan Respýblikasy Konstitýtsiiasynyń avtory retinde memleketimizdiń berik quqyqtyq negizin qurýdaǵy úlesin, el Prezidenti Q.Toqaevtyń elimizdiń negizgi Zańynyń myzǵymastyǵynyń kepili retindegi jetekshi rólin talqylady.
