Qazirgi tańda Astana qalasynda bilim berý salasyn damytýǵa erekshe nazar aýdaryp, oqýshylardyń sapaly bilim alýyna qolaily jaǵdai jasaý maqsatynda aýqymdy jumystar atqarylýda. Qalalyq ákimdik birinshi kezekte jańa mektepterdi ashýǵa barynsha kóńil bólip otyr. Biyldyń ózinde qalada 25 jańa mekteptiń qurylysy josparlanǵan, – dep habarlaidy Dalanews.kz Astana qalasy ákiminiń baspasóz qyzmetine silteme jasap.
Jyl basynan beri 15 mektep paidalanýǵa berildi, onyń toǵyzy «Jaily mektep» ulttyq jobasy aiasynda salynǵan. Jyl sońyna deiin taǵy 9 mekteptiń ashylýy kútilýde, olardyń segizi atalǵan ulttyq joba sheńberinde júzege asyrylmaq
– Jyl sońyna deiin taǵy 9 mektep ashatyn bolamyz. Olardyń segizi – Memleket basshysynyń «Jaily mektep» ulttyq jobasy aiasynda salynǵan mektepter, taǵy bireýi – jeke mektep. Atalǵan toǵyz mektep eki aýysymda taǵy 30 myńnan astam oqýshy ornyn ashýǵa múmkindik beredi, – dep qala basshysy oiyn ortaǵa saldy.
Qala basshysynyń aitýynsha aldaǵy ýaqytta Esil aýdanynda 4 mektep salynsa, Nura aýdanynda – 3 mektep, Almaty aýdanynda – 2 mektep oqýshylardyń paidalanýyna beriledi.
– Qalamyzdy aralaǵan sátte bilim oshaqtarynyń qurylysymen tanysyp, jumystyń kestege sai júrýine basa kóńil bólemiz. Aldaǵy ýaqytta salynatyn mektepterdiń arqasynda 3 aýysymdy 4 mekteptiń jáne bala sany kóp 3 mekteptiń máselesi sheshiletin bolady. Oqý jylynyń basynda biz 15 jańa mektep ashtyq. Jańa mektepterdiń arqasynda 3 aýysymda oqytý júrgizilgen 5 mektep pen bala sany shamadan kóp 4 mekteptiń máselesi sheshildi. Aldaǵy 2025 jyly taǵy 20-dan astam mektep salyp, paidalanýǵa berýdi josparda bar, – dedi Jeńis Qasymbek.
Elordada «Jaily mektep» ulttyq jobasy aiasynda birneshe mekteptiń qurylysy júrip jatyr. 2024-2025 jyldar aralǵyn joba aiasynda Astanada zaman talabyna sai 24 mekteptiń qurylysyn júrgizý josparlanǵan. Jańa úlgidegi mektepter eki aýysymda 90 myńǵa jýyq oqýshyny qabyldaýǵa múmkindik beredi. Bul úsh aýysymdy jáne bala sany kóp mektepter sanyn azaitýǵa baǵyttalǵan mańyzdy qadam bolyp tabylady
2028 jylǵa deiin Astanada 200 myń oqýshyǵa arnalǵan 80 mekteptiń qurylysy josparlanyp otyr. Bul úsh aýysymdy oqytatyn 8 mektep pen qalanyń 16 tyǵyzdalǵan mektebiniń máselesin tolyǵymen sheshýge múmkindik beredi
Búginde Astana qalasynyń ákimdigi men Oqý-aǵartý ministrligi bilim berý salasyn damytýǵa baǵyttalǵan keshendi sharalardy sátti júzege asyrýda. Jańa mektepterdiń salynýy, bilim berý infraqurylymynyń damýy jáne ulttyq jobalardyń iske asyrylýy elordadaǵy bilim sapasyn arttyrýǵa jáne oqýshylardyń qolaily jaǵdaida bilim alýyna septigin tigizetin bolady.
