Merekelik sharanyń ashylý saltanatyna Astana qalasy Dene shynyqtyrý jáne sport basqarmasy basshysynyń orynbasary Erkeǵali Korbozov, jeńil atletika sport túrinen memlekettik jattyqtyrýshy Qýandyq Eljanov jáne №9 BJSM basshysy Aidyn Toqbaev qatysyp, sportshylarǵa sáttilik tiledi.
– Bul shara memleketimizdiń basty merekesi – Táýelsizdik kúnine orai ótkizilip otyr. Basty maqsatymyz – Táýelsizdik – eń basty qundylyǵymyz ekenin bolashaq urpaqqa jetkizý. Sonymen qatar, jalyndap turǵan jastardyń úlken arenalarǵa shyǵýyna dańǵyl jol ashý, qalamyzda jeńil atletikany órkendetýge barynsha kúsh salý. Daryndy jáne qarymdy qyz jigitterimiz elimizde óte kóp. Oǵan eshkimniń kúmáni bolmaýǵa tiis. Dál qazir bizdiń aldymyzda sol jastardy shoqtyǵy biik juldyzdarǵa ainaldyryp, olardy Olga Shishigina, Olga Rypakova, Ǵusman Qosanov sekildi myqty jelaiaqtardyń deńgeiine jetkizý mindeti tur.
Búgingi ótkizilip jatqan dodaǵa qatysýshylardyń sany óte kóp. Árqaisysynyń kózderinen jeńiske degen umtylys anyq baiqaldy, – deidi qalalyq sport basqarma basshysynyń orynbasary Erkeǵali Korbozov.
Jyldy qorytyndylaityn aitýly saiysta jas atletshiler 9 pán, 1 estafeta boiynsha baq synaityn bolady. Aitýly dodaǵa Astana qalasynyń jeńil atletteri ǵana emes, elimizdiń Qaraǵandy, Soltústik Qazaqstan oblysy, Temirtaý, Qaraǵandy qalarynan kelgen 180-ge tarta sportshy qatysýda.
Uiymdastyrýshylardyń aitýynsha biylǵy jarysta úzdik úshtiktegi sportshylar Astana qalasynyń qurama komandasyna iriktelinip, Respýblikalyq, halyqaralyq jarystarǵa qatysýǵa joldama ala alady.
Jarystyń alǵashqy kúni uldar men qyzdar 50 m, 400 m, 1500 m uzyndyqqa sekirip, sporttyq snariadtardy laqtyryp, sondai-aq estafeta jarysynda baqtaryn synady.
Jarystyń qorytyndysy boiynsha qyzdar arasynda 50 m uzyndyqqa sekirýde birinshi oryndy Aidana Aiapova enshilese, ekinshi jáne úshinshi orynǵa Daria Rynda men Anna Mishenko jaiǵasty. Dál osyndai qashyqtyqta uldar arasynda da úzdikter anyqtaldy. Olar: 1-oryn Rýslan Qurmanáliev, 2-oryn Mihail Vovchenko, 3-oryn Artýr Zagorskii.
Al komandalyq estafetalyq júgirý (4×200m) jarysy boiynsha Qaraǵandy qalasynyń komandasynan quralǵan sportshylar (Qaraǵandy-1) 1 saǵat 42 minýt 57 sekýnd ishinde eńserip birinshi bolyp máre syzyǵyn kesti. Ekinshi oryn – Temirtaý qalasynyń qurama komandasynda. Al úzdik úshtikti Qaraǵandy qalasynyń ekinshi qurama komandasy túiindedi.
Aita keteiik ashyq chempionat erteńge deiin jalǵasady.
