Almatyda orta bilimniń qoljetimdiligin qamtamasyz etý úshin qala ákimi Baqytjan Saǵyntaevtyń tapsyrmasy boiynsha memlekettik jáne jekemenshik mektepterdiń qurylysy júrgizilýde. Sondai-aq, jumys istep turǵan bilim berý nysandaryna jańa korpýstar salynyp, birneshe mekemede seismikalyq sharalar kúsheitildi. Bul jyl sońyna deiin 21 myńnan astam jańa oqýshy ornyn ashýǵa múmkindik beredi.
Astana kúnine orai Bostandyq aýdany Orbita-1 yqshamaýdanynda 600 oryndy №60 gimnaziia ǵimaratynyń jańa korpýsy ashyldy. Gimnaziianyń jobalyq qýaty 1700 oqýshy ornyn quraidy.
Gimnaziiada keńeitýdiń arqasynda qosymsha kabinetter paida bolyp, eki aýysymdy oqytý máselesi sheshiledi.
Astana kúnine orai Almaty qalasynda eki jekemenshik mektep ashyldy. Olar, Bostandyq aýdany Baǵanashyl yqshamaýdanynda 60 oryndy "COSMO PRIMARY SHOOL" bastaýysh mektebi jáne qalanyń Áýezov aýdanynda 130 oryndy "AVS School" jeke mektebiniń ashylýy ótti.
Almatyda qala ákimi Baqytjan Saǵyntaevtyń tapsyrmasy boiynsha balabaqshadaǵy oryn tapshylyǵyn tómendetý boiynsha júieli jumystar júrgizilýde. Astana kúni qarsańynda Almaty qalasy, Naýryzbai aýdany Aqjar yqshamaýdanynda memlekettik tilde oqytatyn №194 balabaqshanyń ashylýy ótti. Balabaqshanyń jobalyq qýaty 120 balany quraidy. Sondai-aq, 40 jańa jumys orny quryldy.
Naýryzbai aýdany Taýsamaly yqshamaýdanynda 40 jańa jumys ornymen 120 balaǵa eseptelgen №193 jańa memlekettik balabaqsha ashyldy.
Búginde Almaty qalasynda mektepke deiingi bilim berý ǵimarattaryn salýǵa bos jer ýchaskeleriniń jetispeýinen, ákimdik jalpy bilim beretin mektepterdiń aýmaqtarynda jańa balabaqsha salý týraly sheshim qabyldaǵan bolatyn. Bul balabaqshalardaǵy oryn jetispeýshiligi máselesin sheshýge, ár balaǵa úidiń janyndaǵy mektepke barýǵa ári dostarymen serýendeýge múmkindik beredi.
Al Túrksib aýdanynda memlekettik bilim berý boiynsha 68 balaǵa arnalǵan "Adel" jeke menshik balabaqshasy ashyldy.
– Biz jeke menshik balabaqshada balalarǵa bilim men tárbie berýge memleket tarapynan qoldaýǵa ie boldyq. Qazir jańa oqý jylyna toptar jinaimyz. Balalardy eki jastan bastap qabyldaimyz. Bul orys balabaqshasy, biraq balalarǵa qazaq tilimen aǵylshyn tilderin de úiretemiz. Memlekettik baǵdarlamalardan basqa, bilim berý jobalary da bar, – dedi balabaqsha quryltaishysy Larisa Li.
Bostandyq aýdanynda taǵy bir "ALGABAS-3" jeke menshik balabaqshasynyń ashylýy ótti. Balabaqshanyń jobalyq qýaty 160 balany quraidy. Sondai-aq, 35 jańa jumys orny ashyldy. Atalǵan balabaqsha memlekettik tapsyrys boiynsha jumys isteýdi josparlap otyr.
2021 jyldyń basynan beri Almatyda 1,7 myń oryndy 30-ǵa jýyq jekemenshik uiymdary ashyldy. Jyl sońyna deiin taǵy da 5 myń oryndy 35 jeke balabaqsha ashý josparlanýda. Memlekettik tapsyrys 20 441 orynǵa 397 mektepke deiingi uiymǵa ornalastyryldy.
