Elorda ákiminiń orynbasary Baqtiiar Mákenniń tóraǵalyq etýimen ótken jiynǵa Nur-Sultan qalasy máslihatynyń hatshysy Erlan Qanalimov, Qazaqstannyń Eńbek sińirgen qairatkeri, zań ǵylymdarynyń doktory, qoǵam jáne ǵylym qairatkeri Esbergen Alaýhanov, QR Parlamenti Májilisi I shaqyrylymynyń depýtaty, pedagogika ǵylymdarynyń kandidaty, professor Tólegen Qýanyshev, QR Ulttyq akademiiasynyń akademigi, filologiia ǵylymdarynyń doktory, professor, Qazaqstan ulttyq jaratylystaný ǵylymdary akademiiasynyń vitse-prezidenti Kárimbek Qurmanáliev, qoǵam qaĭratkeri, til janashyry, «Úsh baĭlyq» qoǵamdyq birlestiginiń basshysy Orazkúl Asanǵazy syndy ziialy qaýym ókilderi qatysty.
Jiyn barysynda elorda máslihaty depýtattarynyń aldaǵy jumys jospary tanystyryldy.
– Táýelsizdik – bizdiń bar bailyǵymyz, baǵa jetpes qundylyǵymyz. Memleket basshysy aitqandai, biyl – qoǵam múddesine arnalǵan igi sharalar jyly. Táýelsizdik jolyndaǵy jasampaz jumystar ózderińizben birge iske asyp keledi. Osyǵan orai táý eter qasterli Táýelsizdigimizdiń qundylyǵy jastarymyzdyń sanasyna tereń ornyǵýy kerek. Muny barshamyzǵa júktelip otyrǵan jaýapty mindet dep esepteimiz, – dedi Baqtiiar Máken.
– Ótken jyly Nur-Sultanda aýqymdy sharalar ótti. Atap aitqanda, elordadaǵy birqatar kóshe men mektepterge uly tulǵalardyń esimi berildi. Olardyń qatarynda Smaǵul Sádýaqasov, Mirjaqyp Dýlatov, Sáken Seifýllin, ál-Farabi, Máshhúr-Júsip Kópeiuly syndy iri tulǵalar bar. Sonymen qatar Ábish Kekilbaiuly men Fariza Ońǵarsynovanyń atyna da kóshe berildi. Bul igi ister aldaǵy ýaqytta da jalǵasady, –dedi elorda ákiminiń orynbasary.
Jańadan sailanǵan máslihat depýtattaryna sáttilik tilegen ziialy qaýym ókilderi olarǵa júktelgen mindetterdiń de aýyr ekenin eske saldy. Sonymen qatar elordada atqarylyp jatqan aýqymdy jumystarǵa rizashylyǵyn bildirgen ziialy qaýym ókilderi el Táýelsizdiginiń 30 jyldyǵy, memlekettik tildiń mártebesin kóterý jáne basqa da elordadaǵy ózekti máseleler boiynsha pikir almasty.
Óz kezeginde Orazkúl Asanǵazy áli de qazaq tildi jarnamalarǵa asa mán berý kerektigin aitty.
– Qazirgi Nur-Sultan qalasy buryn Tselinograd qalasy bolyp turǵan kezinde kóshelerde qazaqsha ataý neken-saiaq edi. Astana osy jaqqa kóship kelgennen keiin barlyq kóshe ataýlary qazaqylandy. Qazaqsha kóshe attary boiynsha Qazaqstanda birinshi orynǵa shyqty. Degenmen qazaq tiliniń áli de qoldanys aiasyn keńeitý kerek. Máslihat depýtattary sailaýshylarmen kezdesken kezde turǵyndarmen eń áýeli qazaqsha sóilesýi kerek, – dedi Orazkúl Asanǵazy.
Jiyn sońynda qala ákiminiń orynbasary Baqtiiar Máken barlyq usynys-pikirler nazardan tys qalmaitynyn jetkizdi.
