Otyrysta Astana qalasy Kásipkerler palatasy alańynda Astana qalasy Kásipkerler palatasynyń Kásipkerler quqyǵyn qorǵaý jáne sybailas jemqorlyqqa qarsy is-qimyl jónindegi keńes tóraǵasy Irak Elekeev pen Palata direktory jáne memlekettik organdar men qala prokýratýrasynyń ókilderi qatysty.
Elordalyq kásipkerler biznes-ombýdsmenge biznestiń jekelegen túrlerin odan ári damytý úshin sheshýi qajet jeke jáne júieli problemalar týraly aityp berdi.
Búginde biznes-ombýdsmen institýtynyń jumysyn «Atameken» ulttyq kásipkerler palatasy tolyq qamtamasyz etip keledi. Astana qalasynda biznes-ombýdsmen institýtynyń óńirlik deńgeidegi bólimshe tabysty jumys isteýde.
Biznes-ombýdsmen institýty qaladaǵy kásipkerlerdiń múddelerin qorǵaý úshin qolda bar resýrstardy utymdy jáne tiimdi paidalanýda.
– Bizde naqty mindet boldy, ol – kásipkerlerdiń quqyqtary men múddelerin qorǵaý. Bul, eń aldymen, biznestiń damýyna kedergi keltiretin tosqaýyldar, básekelestikti jáne otandyq biznesti damytýǵa kedergi keltiretin barlyq ruqsat berý, litsenziiaǵa qatysty kedergiler men sybailas jemqorlyq táýekelderin aldyn alýǵa tyrsyp, kásipkerlerge qoldaý bildirip kelemiz, – dedi Kásipkerler quqyǵyn qorǵaý jáne sybailas jemqorlyqqa qarsy is-qimyl jónindegi keńes tóraǵasy Irak Elekeev.
Sondai-aq, basqosýda budan basqa inkliýzivti bilim berý, erekshe bilim berýdi qajet etetin eresek stýdentterge arnalǵan invataksi qyzmeti, aqyly avtoturaqtardy qurý máseleleri de kóterildi.
Elordada invataksi kóliginiń sany artyp, múmkindigi shekteýli jandardyń aiaǵyn uzatty desek bolady. Bul baǵytta eńbek etip júrgen kásipkerlerdiń eńbegi zor.
– Búginde Astana qalasy ákimdigi erekshe qajettiligi bar adamdarǵa qoldaý kórsetýge erekshe kóńil bólinýde. Sońǵy ýaqyttary qalada invataksidiń sany eki ese óskenin atap aitýǵa bolady. Aldaǵy ýaqytta da qoldaý kórsetip, qajetti sharalar qabyldaityn bolamyz, – dedi ákimdik ókili.
Elordada erekshe qajettiligi bar 27 myń adam turady, onyń 5,5 myńy balalar. Qalada eki ońaltý ortalyǵy salynady, qazir ippoterapiiamen ainalysýǵa arnalǵan at sporty kesheniniń qurylysy júrgizilip jatyr.
