Eńbek jáne halyqty áleýmettik qorǵaý ministrliginiń málimetinshe, 2025 jylǵy 1 qarashadaǵy jaǵdai boiynsha elimizde 2 mln 516 myń zeinetker bar. Jyl basynan beri respýblikalyq biýdjetten jalpy 3 trln 512,7 mlrd teńge zeinetaqy tólendi, dep habarlaidy Dalanews.kz.
Atap aitatyq bolsaq, bazalyq zeinetaqyǵa – 1 trln 137,2 mlrd teńge,yntymaqty zeinetaqyǵa – 2 trln 375,5 mlrd teńge baǵyttaldy.
Ortasha jiyntyq zeinetaqy mólsheri 142 744 teńge bolyp, onyń ishinde yntymaqty zeinetaqy – 95 167 teńge, bazalyq zeinetaqy – 47 577 teńgeni quraidy.
2025 jylǵy 1 qańtardan bastap:
- bazalyq zeinetaqy infliatsiia deńgeiinen 2%-ǵa ozyp, 6,5% ósti,
- yntymaqty zeinetaqy – 8,5% artty.
Memleket basshysynyń tapsyrmasyna sáikes, 2023 jyldan bastap bes jyl ishinde bazalyq zeinetaqy eń tómen kúnkóris deńgeiiniń 70%-ynan eń joǵary 120%-yna deiin kezeń-kezeńimen ósiriledi. Mysaly, 2025 jylǵy 1 qańtardan bastap:
- bazalyq zeinetaqynyń eń tómengi mólsheri 32 360 teńge (eń tómengi kúnkóris deńgeiiniń 70%-y),
- eń joǵarǵy mólsheri – 50 851 teńge (eń tómengi kúnkóris deńgeiiniń 110%-y).
Ministrlik atap ótkendei, bazalyq zeinetaqy árbir zeinetkerdiń eńbek ótiline bailanysty esepteledi:
- eńbek ótili 10 jylǵa deiin bolsa – eń tómengi kúnkóris deńgeiiniń 70%-y,
- 20 jyl bolsa – 90%,
- 30 jyl nemese odan kóp bolsa – 110%.
Sondai-aq mindetti zeinetaqy jarnalary Biryńǵai jinaqtaýshy zeinetaqy qoryna turaqty jáne tolyq kólemde aýdarylǵan saiyn, zeinetkerlik jasqa jetkende bazalyq zeinetaqy mólsheri de joǵary bolady.
Ministrlik habarlaǵandai, zeinetaqy tólemderi zeinetkerlikke deiingi ortasha ailyq tabys pen 1998 jylǵy 1 qańtarǵa deiingi eńbek ótiline (keminde 6 ai qajet) bailanysty esepteledi.
