Qazaqstanda aýyr salmaqty júk kólikterine júrgizilgen tekserýler barysynda kólik zańnamasyn buzýdyń 281 faktisi anyqtaldy. Onyń ishinde 116 jaǵdaida kólikterdiń ruqsat etilgen júktemeden artyq júk tasymaldaǵany belgili boldy, dep habarlaidy Dalanews.
Kólik ministrliginiń málimetinshe, 10 shilde men 10 tamyz aralyǵynda respýblika boiynsha «Nazar aýdaryńyz! Aýyr salmaqty kólik!» atty profilaktikalyq aktsiia ótip jatyr. Onyń maqsaty – iri gabaritti jáne aýyr júkterdi tasymaldaýdy baqylaýdy kúsheitý ári avtomobil joldaryn saqtap qalý.
Reid barysynda 500-den astam aýyr júk kóligi tekserilgen.
Sonymen qatar elimizde aýa temperatýrasy +25 gradýstan joǵary bolǵan kezde aýyr júk kólikteriniń qozǵalysyna engiziletin maýsymdyq shekteýler kúshinde qalyp otyr. Bul shara jol jabynynyń búlinýine jol bermeý úshin qabyldanǵan.
Alaida shekteýler halyqaralyq jáne jolaýshylar tasymalyna, tez buzylatyn, qaýipti jáne gýmanitarlyq júkterdi tasymaldaityn kólikterge, sondai-aq tótenshe jaǵdailardy joiýǵa, jol jóndeý jumystaryna jáne áskeri tasymaldarǵa qoldanylmaidy.
Ministrlik málimetinshe, salmaq normalary men maýsymdyq talaptardyń saqtalýyn aýmaqtyq kóliktik baqylaý organdary qadaǵalaidy. Maýsymdyq shekteýlerdi buzǵan 302 júk kóliginiń qozǵalysyna shekteý qoiylyp, tasymaldaýshylar ákimshilik jaýapkershilikke tartylǵan.
