Al 25 sáýirden bastap, otandyq «QazVac» ekpesin egý jumystary bastaldy. Ol 723 adamǵa 1 komponentpen egildi. Jalpy Túrkistan oblysy ekpe egý boıynsha respýblıkada kósh basynda. Bul týraly Óńirlik komýnıkasıalar ortalyǵynda ótken brıfıńte oblystyń bas dárigeri Marat Pashımov málimdedi.
– Túrkistan qalasynda jalpy 10 vaksınasıalaý pýnktteri uıymdastyryldy, onyń ishinde oblystyq departamentter úıinde memlekettik qyzmetshilerge egý pýnkti ashylǵan. Vaksınany saqtaý jáne tasymaldaý sharttary saqtala otyryp, jalpy 80 egý pýnktterinde vaksınasıa jasaý josparlanǵan. Búgingi tanda, barlyq pýnktterde koronavırýstyq ınfeksıaǵa qarsy ekpe salynýda, – dedi Marat Orynbasaruly.
Sondaı-aq, brıfıńke qatysqan oblystyq sanıtarıalyq-epıdemıologıalyq baqylaý departamenti basshysynyń orynbasary Asqar Ysqaqov Túrkistan oblysynda jyl basynan beri karantın talaptaryn buzǵan 2 086 tulǵaǵa 117 mln teńge kóleminde aıyppul salynǵandyǵyn aıtty.
Onyń aıtýynsha, oblys turǵyndary arasynda epıdemıologıalyq ahýaldy eskermeı tyıym salynǵan merekelik is-sharalar ótkizgen 303 derek anyqtalyp, shara kórilgen.
Karantın ýaqytynda kásipkerler jumys turalap qalmaý úshin «Atameken» UKP qoldan kelgen sharany júzege asyrýda. Máselen, «Ashyq» júıesi engizilgen nysandar, oblys qyzyl aımaqqa engen jaǵdaıda da, jasyl aımaqtyń talaptarymen jumysyn júrgizedi. Túrkistan oblysy kásipkerler palatasy dırektorynyń orynbasary Zýhra Amırovanyń sózinshe, mobıldi qosymsha adamdardyń koronavırýsqa shaldyqqanyn nemese saý ekenin kórsetedi. Qazir bul júıe Túrkistan oblysynda 4 mekemede engizilgen.
