Jýyrda tanymal qaiyrymdylyq qordyń jetekshisi Iliias Sariev ustalǵany týraly aqparat tarady. Jýrnalist Rýslan Ótepbai jańa derekti bólisti, - dep habarlaidy Dalanews.kz.
Osy iste Aqtoty esimdi taǵy bir adam ataldy.
"Kúdikti Aqtoty Dúiseevaǵa qatysty 2 (eki) ai merzimge kúzetpen ustaý túrindegi bultartpaý sharasyna sanktsiia berildi. Ol degenimiz Aqtoty tergeý amaldary kezinde bostandyqta shalqyp júrmeidi, sotty "SIZO"-da kútedi degen sóz. Eldiń aqshasy qaida? Muny quzyrly organ anyqtaidy dep oilaimyn… 3 aidan beri jiti nazarymda bolǵan Iliias pen Aqtotynyń isi taiaý kúnderi sotqa joldanady", - dedi jýrnalist.
Bloger nelikten ustaldy?
"Elge kómek ber" qaiyrymdylyq qorynyń jetekshisi Iliias Sariev ustalǵanyn alǵashynda zańger Nursultan Orynbekov málimdedi. Onyń sózinshe, jurttan Sarievtiń ústine aryz túsken.
"Qazaq Robin Gýd Iliias Sariev alaiaqtyq baby boiynsha ustaldy. Almatydan osyndai habar keldi. Birneshe adamnan alaiaqtyq áreketi boiynsha aryz túsken edi. Qazir sol boiynsha ustalǵany belgili boldy. Aldanǵandar bolsa, Almaty IID-ne aryzdansańyzdar bolady", - dedi ol.
Artynsha Dalanews.kz Almaty Politsiia departamentine saýal joldap, resmi aqparat ta aldy.
"Almaly aýdandyq PB-na qarasty politsiia bólimi alaiaqtyq deregi boiynsha qylmystyq is qozǵady. Jan-jaqty jáne obektivti tergeýge baǵyttalǵan tergeý sharalary júrgizilip jatyr. Olardyń qorytyndysy boiynsha protsessýaldyq sheshim qabyldanady", - dep jazylǵan Almaty Politsiia departamentiniń buǵan deiingi jaýabynda.
