Qazaqstanda geologiialyq zertteý júiesin jańǵyrtý jumystary nátijesin bere bastady. Sońǵy eki jylda el aýmaǵynan 54 jańa ken orny tabylyp, memlekettik esepke alyndy, dep habarlaidy dalanews.kz.
2025 jyly 1:50 000 masshtabtaǵy 20 geologiialyq túsirilim jobasy daiyndalyp, olardy iske asyrý 2026 jyly bastaldy. Zertteý jumystary altyn, mys, polimetall, litii jáne sirek jer metaldarynyń qory bolýy yqtimal 100 myń sharshy shaqyrym aýmaqty qamtidy.
Úkimet málimetinshe, 2024–2025 jyldary júrgizilgen geologiialyq barlaý jumystary altyn, kúmis, mys, hrom, temir men fosforit resýrstaryn, sondai-aq jerasty sýy qorlaryn ulǵaitýǵa múmkindik bergen. Qazir memlekettik esepte paidaly qazbalardyń ártúrli túrine jatatyn 10 myńǵa jýyq ken orny bar.
Sonymen qatar elimizde sirek jer metaldarynyń 935,4 myń tonna kólemindegi boljamdy resýrsy anyqtalǵan. Zertteý jumystary 11 ýchaskede aiaqtaldy. Solardyń ishinde Qaraǵandy oblysyndaǵy Quirektykól ýchaskesi asa perspektivaly sanalady. Bul aýmaqtan zamanaýi joǵary tehnologiialyq óndiristerde keńinen qoldanylatyn sirek jer metaldary tabylǵan.
Geologiia salasyn tsifrlandyrý jumystary da jalǵasyp jatyr. Búginge deiin 4,8 millionnan astam geologiialyq aqparat birligi elektrondy formatqa kóshirilgen. Biryńǵai jer qoinaýyn paidalaný platformasyna 66,1 myń geologiialyq esep pen zerttelgen aýmaqtardy kórsetetin 109,5 myń kontýr engizildi.
