– Búgingi kúni qamaýǵa alynǵandar arasynda tyiym salynǵan ekstremistik aǵymdardyń 35 múshesi bar. Mysaly, Almatyda destrýktivti dini aǵymnyń qylmystyq baǵyttaǵy bir top múshesi ustaldy. Ustaý kezinde qoldanýǵa daiyn atys qarýy tabyldy. Olar óz áreketterin jaqsylap josparlaǵan. Bir bóligi qalanyń tómengi bóligindegi barrikadalarda, al ekinshisi alańda bolǵan, – dedi Rizabek Ojarov Ortalyq kommýnikatsiialar qyzmetinde ótken baspasóz máslihatynda.
Jalpy elimizdegi jappai tártipsizdikterdi uiymdastyrý kúdigimen 467 adam qamaýǵa alynǵan.
– Búginde vedomstvoaralyq jedel-tergeý toby terrorizm aktisi men jappai tártipsizdikterdi tergeýdi jalǵasýda. Jumystar 8 óńir boiynsha, Almaty, Shymkent qalalarynda jáne Almaty, Jambyl, Qyzylorda, Shyǵys Qazaqstan, Aqtóbe jáne Atyraý oblystarynda júrgizilýde. Sebebi dál osy aimaqtarda adamdar ólimderi oryn aldy. Memlekettik jáne jeke nysandar qiratylyp, órteldi, – dedi Rizabek Ojarov.
Onyń atap ótýinshe, bir aidyń ishinde vedomstvoaralyq top aýqymdy kólemde tergeý jumystaryn atqarǵan.
– Jaýaptar alynýda, beinematerialdar zerdelenýde. Saraptamalar taǵaiyndalýda, eksgýmatsiialar, máiitterdi identifikatsiialaý júrgizilýde jáne olardyń qaitys bolý sebepteri anyqtalýda. Osy rette azamattardyń dáleldemeler jinaýdaǵy belsendi kómegin atap ótkim keledi. Bizdiń «Stopterrorizm» saityna 1672 fail júktelgen, – dedi ol.
Bas prokýratýra ókiliniń dereginshe, olar «Qańtar oqiǵasyna» qatysty video jáne fotosýretterdi quraidy.
– Biznes ókilderi de kómektesýde. Olar beinebaqylaý kameralary men jazylǵan aqparattardy jiberýde. IT-tehnologiialardy paidalana otyryp, oqiǵalarǵa qatysy bar barlyq adamdardy anyqtaýdy jalǵastyryp jatyrmyz. Jappai tártipsizdikterdi uiymdastyrý men oǵan qatysý jáne terrorizm aktisin jasaýǵa qatysty 467 adam qamaýǵa alyndy. Biz olardyń jeke basyn, otbasylyq jaǵdaiyn, jasyn, densaýlyq jaǵdaiyn, qatysý dárejesin, óz isterine degen kózqarasyn jáne basqa da sipattaityn derekterdi muqiiat zertteimiz, – dep atap ótti qadaǵalaýshy organ ókili.
