Shyǵys Qazaqstan oblysynyń kúnderinde astanalyqtar jáne qala qonaqtary «Etnoaýyl» ulttyq-mádenı kesheninde biregeı arheologıalyq jádigerler jáne ekspozısıalarmen tanysýǵa múmkindik aldy. Atalǵan arheologıalyq kórmege Katonqaraǵaı aýdanyndaǵy Berel, Zaısan aýdanyndaǵy Shilikti qorǵandarynan jáne Ulan aýdanyndaǵy Ablaıkıt bekinis-monastrinen tabylǵan 3000-nan astam jádiger kóshirmeleri qoıylǵan.
Sonymen qatar, kórmege Qazaqstanǵa tanymal ǵalymdar – Zeınolla Samashevtyń, Ábdesh Tólebaevtyń, Karl Baıpaqovtyń oblysta jasaǵan sońǵy eki jyldaǵy eńbekterdi usynyldy. Bul ǵalymdardyń barlyǵy Shyǵys Qazaqstanda úsh jylǵa josparlanǵan arheologıalyq baǵdarlama aıasynda eńbek etýde. Eki jyl ishinde arheologıalyq baǵdarlamany qarjylandyrýǵa oblystyq búdjetten 200 mln. teńge qarajat bólindi.
Sondaı-aq, «Etnoaýyl» kesheninde oblystyń qolóner sheberleriniń kórmesi uıymdastyryldy. Qolóner sheberleri elorda turǵyndaryna bylǵarydan, aǵashtan, túrli-tústi metaldardan jasalǵan erekshe týyndylardy tartý etti. Týyndylardyń avtorlary, elimizge tanymal sheberler – Boqbasarova Aıman, Jumataı Aıbyn, Qojamjarova Gúlnar, Jýkova Natalá jáne t.b. Sheberler Astanaǵa qalasyna ózderi jasaǵan týyndylaryn ǵana ákelip qoımaı, kórmege kelýshilerge toqyma toqý, aǵashtardan buıymdardy daıyndaý boıynsha sheberlik saǵattaryn ótkizýde. Keshen aýmaǵyna qoıylǵan foto-kórmesi kelýshilerdi erekshe qyzyqtyrýda. Foto-kórmege Shyǵys Qazaqstan oblysynyń tarıhı jerleri, tabıǵaty sulýlyǵymen tamsandyratyn eldi-mekenderi atap aıtqanda, Muztaý taýy, Rahman qaınarlary, Kıın-Kırısh, Sibe kólderi, Alakól, «Jıdebaı bórili» kesheni, Buqtyrma sý qoımasynyń jáne t.b. úzdik fotosýretteri qoıyldy.
Kórmede Shyǵys Qazaqstan oblysynyń Ámire Qashaýbaev atyndaǵy memlekettik fılarmonıasynyń konserti ótýde. Oblystaǵy dástúrli án oryndaýshylar, ulttyq aspaptar orkestri, Abaı atyndaǵy jáne oblystyq drama teatrlardyń ártisteri úzdik shyǵarmalardy oryndaýda.
«Qazanat» atshabarynda oblystyń sportshylary ulttyq sport túrleri boıynsha kórsetilimdik qoıylymdar qoıýda. Astana tórinde kókpar, qazaqsha kúres, aýdaryspaq sıaqty ulttyq sport túrleri boıynsha úzdik sportshylar óner kórsetýde. Olardyń quramynda, aýdaryspaq boıynsha Qazaqstannyń bes dúrkin chempıony Erzat Japıshev, Qazaqsha kúresten Qazaqstan chempıondary Erzat Arǵynov, Ádil Tókeshev, Farhat Qaıyrbekov jáne Aıbek Aǵybaev. Qyz qýý, Jamby atý, Toǵyzqumalaq boıynsha jarystar óte tartysty ótýde. Sondaı-aq Shyǵys Qazaqstan oblysy Astanaǵa ulttyq sport túrleri boıynsha arnaıy daıyndalǵan 30 sport atyn alyp keldi.
Jalpy, Shyǵys Qazaqstan oblysynyń kúnderi Etnoaýyldaǵy kórmelermen shektelip qalmaýda. Kún saıyn «Báıterek» monýmentiniń alańy men Jastar saıabaǵynda Shyǵys Qazaqstan oblysynan shyqqan Qazaqstan estrada juldyzdarynyń qatysýymen oıyn-saýyq is-sharalary ótýde.
Shyǵys Qazaqstan oblysynyń kúnderi «EKSPO-2017» keshenindegi Amfıteatrda ótetin «Shyraıly Shyǵystan-ataǵy asqaq Astanaǵa» atty gala-konsertimen qorytyndylanady. 25 shilde kúni gala-konsertke Qazaq SSR-niń Halyq ártisi Roza Rymbaeva, jastardyń súıikti oryndaýshysy Alı Oqapov, sonymen qatar, Shyǵys Qazaqstannyń úzdik shyǵarmashylyq ujymdary qatysady.
«EKSPO-2017» halyqaralyq kórmesin, bastalǵaly beri 36 700-nan astam shyǵysqazaqstandyq tamashalaǵan. Aǵymdaǵy jylǵy 23 shildedege deıin oblysta «EKSPO-2017» kórmesine 89 700 bılet satylyp alynǵan.
Bul josparlanǵan 100 myń adamnyń 90 paıyzyn quraıdy. Sonymen qatar, Halyqaralyq kórmeni oblystaǵy 26 000 bala, onyń ishinde az qamtylǵan otbasylardan shyqqan 15 500 bala, 905 jetim bala, 3 750 darynda bala jáne 4 595 kolej stýdentteri tamashalaıtyn bolady. Bul úshin oblystyq búdjetten 419 mln. teńge qarajat bóligen bolatyn.
