شىعىس قازاقستان وبلىسىنىڭ كۇندەرىندە استانالىقتار جانە قالا قوناقتارى «ەتنواۋىل» ۇلتتىق-مادەني كەشەنىندە بىرەگەي ارحەولوگيالىق جادىگەرلەر جانە ەكسپوزيسيالارمەن تانىسۋعا مۇمكىندىك الدى. اتالعان ارحەولوگيالىق كورمەگە كاتونقاراعاي اۋدانىنداعى بەرەل، زايسان اۋدانىنداعى شىلىكتى قورعاندارىنان جانە ۇلان اۋدانىنداعى ابلايكيت بەكىنىس-موناسترىنەن تابىلعان 3000-نان استام جادىگەر كوشىرمەلەرى قويىلعان.
سونىمەن قاتار، كورمەگە قازاقستانعا تانىمال عالىمدار – زەينوللا ساماشيەۆتىڭ، ابدەش تولەبايەۆتىڭ، كارل بايپاقوۆتىڭ وبلىستا جاساعان سوڭعى ەكى جىلداعى ەڭبەكتەردى ۇسىنىلدى. بۇل عالىمداردىڭ بارلىعى شىعىس قازاقستاندا ءۇش جىلعا جوسپارلانعان ارحەولوگيالىق باعدارلاما اياسىندا ەڭبەك ەتۋدە. ەكى جىل ىشىندە ارحەولوگيالىق باعدارلامانى قارجىلاندىرۋعا وبلىستىق بيۋدجەتتەن 200 ملن. تەڭگە قاراجات ءبولىندى.
سونداي-اق، «ەتنواۋىل» كەشەنىندە وبلىستىڭ قولونەر شەبەرلەرىنىڭ كورمەسى ۇيىمداستىرىلدى. قولونەر شەبەرلەرى ەلوردا تۇرعىندارىنا بىلعارىدان، اعاشتان، ءتۇرلى-تۇستى مەتاللداردان جاسالعان ەرەكشە تۋىندىلاردى تارتۋ ەتتى. تۋىندىلاردىڭ اۆتورلارى، ەلىمىزگە تانىمال شەبەرلەر – بوقباساروۆا ايمان، جۇماتاي ايبىن، قوجامجاروۆا گۇلنار، جۋكوۆا ناتاليا جانە ت.ب. شەبەرلەر استاناعا قالاسىنا وزدەرى جاساعان تۋىندىلارىن عانا اكەلىپ قويماي، كورمەگە كەلۋشىلەرگە توقىما توقۋ، اعاشتاردان بۇيىمداردى دايىنداۋ بويىنشا شەبەرلىك ساعاتتارىن وتكىزۋدە. كەشەن اۋماعىنا قويىلعان فوتو-كورمەسى كەلۋشىلەردى ەرەكشە قىزىقتىرۋدا. فوتو-كورمەگە شىعىس قازاقستان وبلىسىنىڭ تاريحي جەرلەرى، تابيعاتى سۇلۋلىعىمەن تامساندىراتىن ەلدى-مەكەندەرى اتاپ ايتقاندا، مۇزتاۋ تاۋى، راحمان قاينارلارى، كيين-كيريش، سىبە كولدەرى، الاكول، «جيدەباي ءبورىلى» كەشەنى، بۇقتىرما سۋ قويماسىنىڭ جانە ت.ب. ۇزدىك فوتوسۋرەتتەرى قويىلدى.
كورمەدە شىعىس قازاقستان وبلىسىنىڭ امىرە قاشاۋبايەۆ اتىنداعى مەملەكەتتىك فيلارمونياسىنىڭ كونسەرتى وتۋدە. وبلىستاعى ءداستۇرلى ءان ورىنداۋشىلار، ۇلتتىق اسپاپتار وركەسترى، اباي اتىنداعى جانە وبلىستىق دراما تەاترلاردىڭ ارتىستەرى ۇزدىك شىعارمالاردى ورىنداۋدا.
«قازانات» اتشابارىندا وبلىستىڭ سپورتشىلارى ۇلتتىق سپورت تۇرلەرى بويىنشا كورسەتىلىمدىك قويىلىمدار قويۋدا. استانا تورىندە كوكپار، قازاقشا كۇرەس، اۋدارىسپاق سياقتى ۇلتتىق سپورت تۇرلەرى بويىنشا ۇزدىك سپورتشىلار ونەر كورسەتۋدە. ولاردىڭ قۇرامىندا، اۋدارىسپاق بويىنشا قازاقستاننىڭ بەس دۇركىن چەمپيونى ەرزات جاپيشيەۆ، قازاقشا كۇرەستەن قازاقستان چەمپيوندارى ەرزات ارعىنوۆ، ءادىل توكەشيەۆ، فارحات قايىربەكوۆ جانە ايبەك اعىبايەۆ. قىز قۋۋ، جامبى اتۋ، توعىزقۇمالاق بويىنشا جارىستار وتە تارتىستى وتۋدە. سونداي-اق شىعىس قازاقستان وبلىسى استاناعا ۇلتتىق سپورت تۇرلەرى بويىنشا ارنايى دايىندالعان 30 سپورت اتىن الىپ كەلدى.
جالپى، شىعىس قازاقستان وبلىسىنىڭ كۇندەرى ەتنواۋىلداعى كورمەلەرمەن شەكتەلىپ قالماۋدا. كۇن سايىن «بايتەرەك» مونۋمەنتىنىڭ الاڭى مەن جاستار ساياباعىندا شىعىس قازاقستان وبلىسىنان شىققان قازاقستان ەسترادا جۇلدىزدارىنىڭ قاتىسۋىمەن ويىن-ساۋىق ءىس-شارالارى وتۋدە.
شىعىس قازاقستان وبلىسىنىڭ كۇندەرى «ەكسپو-2017» كەشەنىندەگى امفيتەاتردا وتەتىن «شىرايلى شىعىستان-اتاعى اسقاق استاناعا» اتتى گالا-كونسەرتىمەن قورىتىندىلانادى. 25 شىلدە كۇنى گالا-كونسەرتكە قازاق ءسسر-نىڭ حالىق ءارتىسى روزا رىمبايەۆا، جاستاردىڭ سۇيىكتى ورىنداۋشىسى الي وقاپوۆ، سونىمەن قاتار، شىعىس قازاقستاننىڭ ۇزدىك شىعارماشىلىق ۇجىمدارى قاتىسادى.
«ەكسپو-2017» حالىقارالىق كورمەسىن، باستالعالى بەرى 36 700-نان استام شىعىسقازاقستاندىق تاماشالاعان. اعىمداعى جىلعى 23 شىلدەدەگە دەيىن وبلىستا «ەكسپو-2017» كورمەسىنە 89 700 بيلەت ساتىلىپ الىنعان.
بۇل جوسپارلانعان 100 مىڭ ادامنىڭ 90 پايىزىن قۇرايدى. سونىمەن قاتار، حالىقارالىق كورمەنى وبلىستاعى 26 000 بالا، ونىڭ ىشىندە از قامتىلعان وتباسىلاردان شىققان 15 500 بالا، 905 جەتىم بالا، 3 750 دارىندا بالا جانە 4 595 كوللەدج ستۋدەنتتەرى تاماشالايتىن بولادى. بۇل ءۇشىن وبلىستىق بيۋدجەتتەن 419 ملن. تەڭگە قاراجات بولىگەن بولاتىن.
