EKSPO-2017 halyqaralyq kórmesinde Ońtústik Qazaqstan oblysynyń foto-kórmesi ótti. Kórmege qoiylǵan 25 foto sýrette Q.A.Iassaýi jáne Arystan bab, Qarashash ana keseneleri, kóne Otyrar men Saýran qalalary, Aqmeshit úńgiri, "Alash" etno aýyly, etno-ortalyq beinelengen. Ekspozitsiiaǵa kúngeidiń tamasha tabiǵatynyń fotosýretteri de enip otyr.
Foto-kórmege EKSPO komissarlary, komissarlardyń orynbasarlary, kórmelerdiń halyqaralyq biýrosynyń delegattary men pavilon direktorlary, diplomatiialyq ókildik basshylary, halyqaralyq iri kompaniialardyń ieleri men 100 elden kelgen qonaqtar qatysty.
Ońtústiktegi týrizmniń damýyn jańa satyǵa kóteretin is-sharaǵa Ońtústik Qazaqstan oblystyq kásipkerlik, indýstrialdy-innovatsiialyq damý jáne týrizm basqarmasy muryndyq bolypty. Basqarmanyń ideiasyna Ontustik Tourism jáne "Ońtústik Qazaqstan oblysyndaǵy týrizm indýstriiasyn damytý ortalyǵy" qoldaý bildirgen.
"Eń aldymen, EKSPO-2017 halyqaralyq kórmesi álemdik deńgeidegi aýqymdy is-shara ekenin atap ótý kerek. Al Sizder tańdap alǵan "Bolashaqtyń energiiasy" taqyryby osy jarqyn bolashaqqa jaqyndap, alǵa qadam basýǵa múmkindik beredi. Men EKSPO-2017 kórmesinen keremet áser alyp júrmin. Qazaqstan meni baýrap aldy. Osynda kelgeli beri biznes-qaýymdastyqpen kezdesip, bolashaqqa jospar qurdyq. Qazaqstannyń Ońtústiginde týrister qyzyǵatyn jer óte kóp, tarihy bai, tabiǵaty tamasha. Sondyqtan, Ońtústikke saiahattap barýdy josparlap otyrmyn», - deidi Úndistannan kelgen «Uly Jibek joly» pavilonynyń komissary Lý Dji.
Aita keteiik, Ońtústik Qazaqstan oblysy osyndai is-sharany ótkizgen alǵash oblys. Bul halyqaralyq dárejedegi alańshada ishki jáne syrtqy baǵyttaǵy týrizmdi damytýǵa, sheteldik týristerdiń qyzyǵýshylyǵyn týdyrýǵa jaqsy múmkindik.
"Maqsatymyz - Ońtústik Qazaqstandy búkil álem qyzyǵatyn týristik ólke retinde tanytý. Bir belgilisi - Qazaqstan men Ońtústik Qazaqstan oblysynyń bul tustaǵy áleýeti óte keń. EKSPO-2017 kórmesi osy áleýetti damytýǵa kómektesedi dep senemiz" deidi uiymdastyrýshylar.
