ەكسپو-2017 حالىقارالىق كورمەسىندە وڭتۇستىك قازاقستان وبلىسىنىڭ فوتو-كورمەسى ءوتتى. كورمەگە قويىلعان 25 فوتو سۋرەتتە ق.ا.ياسساۋي جانە ارىستان باب، قاراشاش انا كەسەنەلەرى، كونە وتىرار مەن ساۋران قالالارى، اقمەشىت ۇڭگىرى، "الاش" ەتنو اۋىلى، ەتنو-ورتالىق بەينەلەنگەن. ەكسپوزيسياعا كۇنگەيدىڭ تاماشا تابيعاتىنىڭ فوتوسۋرەتتەرى دە ەنىپ وتىر.
فوتو-كورمەگە ەكسپو كوميسسارلارى، كوميسسارلاردىڭ ورىنباسارلارى، كورمەلەردىڭ حالىقارالىق بيۋروسىنىڭ دەلەگاتتارى مەن پاۆيلون ديرەكتورلارى، ديپلوماتيالىق وكىلدىك باسشىلارى، حالىقارالىق ءىرى كومپانيالاردىڭ يەلەرى مەن 100 ەلدەن كەلگەن قوناقتار قاتىستى.
وڭتۇستىكتەگى ءتۋريزمنىڭ دامۋىن جاڭا ساتىعا كوتەرەتىن ءىس-شاراعا وڭتۇستىك قازاقستان وبلىستىق كاسىپكەرلىك، يندۋستريالدى-يننوۆاسيالىق دامۋ جانە تۋريزم باسقارماسى مۇرىندىق بولىپتى. باسقارمانىڭ يدەياسىنا Ontustik Tourism جانە "وڭتۇستىك قازاقستان وبلىسىنداعى تۋريزم يندۋسترياسىن دامىتۋ ورتالىعى" قولداۋ بىلدىرگەن.
"ەڭ الدىمەن، ەكسپو-2017 حالىقارالىق كورمەسى الەمدىك دەڭگەيدەگى اۋقىمدى ءىس-شارا ەكەنىن اتاپ ءوتۋ كەرەك. ال سىزدەر تاڭداپ العان "بولاشاقتىڭ ەنەرگياسى" تاقىرىبى وسى جارقىن بولاشاققا جاقىنداپ، العا قادام باسۋعا مۇمكىندىك بەرەدى. مەن ەكسپو-2017 كورمەسىنەن كەرەمەت اسەر الىپ ءجۇرمىن. قازاقستان مەنى باۋراپ الدى. وسىندا كەلگەلى بەرى بيزنەس-قاۋىمداستىقپەن كەزدەسىپ، بولاشاققا جوسپار قۇردىق. قازاقستاننىڭ وڭتۇستىگىندە تۋريستەر قىزىعاتىن جەر وتە كوپ، تاريحى باي، تابيعاتى تاماشا. سوندىقتان، وڭتۇستىككە ساياحاتتاپ بارۋدى جوسپارلاپ وتىرمىن»، - دەيدى ءۇندىستاننان كەلگەن «ۇلى جىبەك جولى» پاۆيلونىنىڭ كوميسسارى لۋ دجي.
ايتا كەتەيىك، وڭتۇستىك قازاقستان وبلىسى وسىنداي ءىس-شارانى وتكىزگەن العاش وبلىس. بۇل حالىقارالىق دارەجەدەگى الاڭشادا ىشكى جانە سىرتقى باعىتتاعى ءتۋريزمدى دامىتۋعا، شەتەلدىك تۋريستەردىڭ قىزىعۋشىلىعىن تۋدىرۋعا جاقسى مۇمكىندىك.
"ماقساتىمىز - وڭتۇستىك قازاقستاندى بۇكىل الەم قىزىعاتىن تۋريستىك ولكە رەتىندە تانىتۋ. ءبىر بەلگىلىسى - قازاقستان مەن وڭتۇستىك قازاقستان وبلىسىنىڭ بۇل تۇستاعى الەۋەتى وتە كەڭ. ەكسپو-2017 كورمەسى وسى الەۋەتتى دامىتۋعا كومەكتەسەدى دەپ سەنەمىز" دەيدى ۇيىمداستىرۋشىلار.
