EKSPO-2017 kórmesi kezinde Astanaǵa OQO-dan 10 tonnadai balmuzdaq jetkiziledi
«EKSPO-2017» halyqaralyq kórmesi jaqyndaǵan saiyn daiyndyq jumystary da kúsheitile tústi. Bul aýqymdy is-sharaǵa túrli óńirlerdiń kásipkerleri de ázirlenip jatyr. Sheteldik qonaqtar men otandastarymyz Elorda tórinde tek ǵylymi jetistikterdi kórip qana qoimai, qazaqstandyq óndirýshilerdiń azyq-túlik ónimderin de tutynady. Sol kompaniialardyń arasynda oblysymyzdaǵy balmuzdaq shyǵaratyn eki kásiporyn bar», - delingen maqalada.
Oblystyq aýyl sharýashylyǵy basqarmasynyń málimetine súiensek, kórmege orai Astanaǵa «Balmuzdaq» jáne «Aziia holod» jaýapkershiligi shekteýli seriktestikteri mamyr aiynda 5 tonnadan, jalpy, 10 tonnadai balmuzdaq jiberedi. Suranysqa bailanysty jospar ózgerip, balmuzdaq kólemi artýy da, kemýi de múmkin. Taiaýda qos kompaniiaǵa basqarmadan resmi hat joldanyp, jospar jasaldy. Eń bastysy, otandyq taýar óndirýshilerdiń «EKSPO-2017» kórmesine kóptep shaqyrylýy bizdiń kásipkerler úshin óte tiimdi. Kórmeni uiymdastyrýshylardyń tańdaýy bul kompaniialarǵa beker túsip otyrǵan joq.
Tóle bi aýdanynda ornalasqan «Balmuzdaq» JShS-nyń ónimderi sapasy men til úiirer dámi arqyly talailardy tamsandyryp úlgergen. 1987 jyly ashylǵan «Balmuzdaq» JShS táýelsizdik alǵannan keiin qanatyn keńge jaiyp, ónim kólemi arta tústi.
Elimizdiń birneshe oblysynyń naryǵyn jaýlaǵan tólebilikter kórshiles Qyrǵyzstanǵa da balmuzdaq jibergen. «Aziia holod» JShS de búginde óz ónimderimen jurtshylyqqa unap júr. Shymkenttiń balmuzdaǵyna suranys joǵary. Úsh aida Astanadaǵy kórmege 5 milliondai adam keledi degen boljam bar. Demek, aldaǵy ýaqytta «Balmuzdaq» pen «Aziia holod» óndiris kólemin ulǵaitýǵa kúsh salýy múmkin.
