Eks-vıse-mınıstr Tımýr Toqtabaevtan tárkilengen qymbat kóligi Bentley qaıtadan satylmaı qaldy, - dep habarlaıdy Dalanews.kz.
Sebebi E-auction elektron saýda portalynda 24 shildede saǵat 10-da ótýi kerek bolǵan saýda ótpeı qalǵan. Satylymǵa sheneýniktiń 2021 jylǵy Bentley Bentayga V8 jol talǵamaıtyn kóligi qoıylǵan. Lottaǵy málimet boıynsha, saýdaǵa birde-bir qatysýshy tirkelmegen.
Lottyń bastapqy quny 104,3 mıllıon teńge. Saýda-sattyqqa qatysý úshin kepildik jarna 15,6 mln teńge bolýy tıis edi.
Eske salaıyq, buǵan deıin eks-vıse-mınıstr Toqtabaevtyń qymbat kólikterin satý boıynsha saýda ótpeı qalǵanyn jazǵan edik.
Jalpy quny 200 mıllıon teńge bolatyn avtokólikter memlekettik zańdy tulǵalardyń balansyndaǵy múlikti keıinnen berý jáne biriktirý úshin aýksıonǵa qoıylady. Kólikterdi tek bir qatysýshyǵa satýǵa ruqsat berý kózdelgen.
"Usynys memlekettiń qaýipsizdigin qamtamasyz etý, zańdylyqty, quqyqtyq tártipti saqtaý, múlikti tárkileý bóliginde qylmystyq is boıynsha sot úkimi negizinde tyıym salynǵan múlikti ótkizý nemese paıdalaný qaǵıdalarynda belgilengen ólshemderge sáıkes bolǵan kezde qylmystyq quqyq buzýshylyqtardyń aldyn alý jáne jolyn kesý maqsatynda quqyq qorǵaý jáne arnaýly memlekettik organdar bolyp tabylatyn memlekettik zańdy tulǵalarǵa berýge arnalǵan", - delingen habarlamada.
Habarlandyrý "Elektron saýda alańynda" jarıalanǵan. Sonymen qatar, saıtta avtokólikterdiń sýretteri de bar.
Saýdaǵa 2021 jylǵy qara Bentley Bentayga V8 qoıyldy. Avtokólikti baǵalaý osy jyldyń sáýir aıynda júrgizildi. Baǵalaýshy kompanıa krosoverdiń naryqtyq qunyn 104 mıllıon 316 myń teńge dep belgilegen.
Aq Mercedes Benz Maybach s580 4MATIC 2021 jyly shyǵarylǵan avtokólik sál tómen somaǵa baǵalandy. Onyń naryqtyq quny 79 mıllıon 839 myń teńge bolǵan.
Aıta keteıik, Bentley Bentayga avtokóligi boıynsha saýda-sattyq 2024 jyldyń 3 shildesinde qtýi kerek bolǵan, biraq olar qatysýǵa ótinishtiń bolmaýyna baılanysty ótpegen.
Mercedes-Benz Maybach S580 avtokóligin satý boıynsha saýda 5 shildede ótýi kerek bolǵanymen keıinge qaldyrylǵan.
Aıta keteıik, 2022 jyly qarashada Antıkor men Bas prokýratýra Indýstrıa jáne ınfraqurylymdyq damý mınıstrligindegi laýazymdy tulǵalarǵa qatysty tergeý bastalǵanyn habarlaǵan bolatyn.
Keıinnen eks-vıse-mınıstr Tımýr Toqtabaev ustalǵany belgili boldy. Tımýr Toqtabaev 2023 jyldyń qazan aıynda laýazymdyq ókilettikterin asyra paıdalanǵany úshin jeti jylǵa sottaldy.
