QR Premer-mınıstri Oljas Bektenov Úkimet otyrysynda "G-Park" qurylys kompanıasynyń Astanada 7 turǵyn úıdi ruqsat qujattarynsyz salyp jatqanyn málimdedi. Sonymen qatar, osy úılerge 3,5 myń otbasynyń qarjy salyp qoıǵanyn aıtty, - dep habarlaıdy Dalanews.kz.
Óndiris jáne qurylys mınıstrligi málimetinshe, problema órship barady. Qazir el boıynsha 340 turǵyn úı kesheni zańsyz salynýda.
"Astana máslıhatynyń eks-depýtaty, G-Park basshysy Ǵabıt Sátmaǵambetovty úlken problemalar kútip tur deıdi, DALA INSIDE derekkózi", - dep jazdy DALA INSIDE arnasy.
Arna málimetinshe, premer-mınıstr Oljas Bektenovtyń dál osy qurylys kompanıasyn atap aıtqany, Sátmaǵambetovtyń ár qadamyn ańdyp otyrǵan quqyq qorǵaý organdary úshin sıgnal bolýy da múmkin. Odan bólek, Astana ákimi Jeńis Qasymbek te "Sátmaǵambetov máselesin" tezirek sheshýge nıetti.
"Sátmaǵambetovtyń ózin jaýapqa tartýmen is bitpeıin dep tur. Eks depýtat kóp nárseni búldirgen. İs nasyrǵa shapsa, memleketke onyń nysandaryn óz qaraýyna alyp, qujattaryn rettep, kepildik mehanızmi aıasynda salyp bitirýge týra keledi. Sebebi 3,5 myń úlesker áleýmettik tolqýlar týǵyza alatyn kúshke ıe", - dep jazylǵan arna málimetinde
"Aqtóbe oblysynda 11 obekti boıynsha aldanǵan úleskerler 2 jyldan beri sottasyp keledi. Astanadaǵy "Arabı-2 – Granıtnyı-2" turǵyn úı kesheni 10 jyl buryn problemalyq nysan dep tanylǵan. 200-ge jýyq otbasy úılerin ala almaı otyr. Qujattary durys emes kóptegen obektilerdiń qurylys jumystary sozylyp ketýi múmkin. Elordada G-Park kompanıasy ruqsat qujattaryn almastan 7 turǵyn úı qurylysyn júrgizýde. Al oǵan 3,5 myńǵa jýyq otbasy óz qarajatyn salǵan. Atyraý oblysynda mundaı obektiler sany – 39. Bul – birinshi kezekte, ákimdikterdiń tarapynan jiberilgen kemshilikterdiń saldary", - dedi Bektenov Úkimet otyrysynda.
Osynyń aldynda Astana polısıasy Sátmaǵambetov quryltaıshy bolyp tabylatyn "Nur-Sultan Fınans" JSHS úleskerleriniń aryzy boıynsha qylmystyq is qozǵaǵan bolatyn.
"Astana qalasy Esil aýdanynyń polısıa basqarmasy úleskerlerdiń ótinishi boıynsha QR QK 190-babynyń 2-bóligi (alaıaqtyq) boıynsha sotqa deıingi tergep-tekserý jumystaryn júrgizýde. Onyń negizinde istiń mán-jaıyn anyqtaý úshin tıisti sharalar qabyldanady. Qazirgi ýaqytta barlyq qajetti tergeý áreketteri júrgizilýde. Nátıjesi boıynsha kináli tulǵalardyń is - áreketterine quqyqtyq baǵa berilip, atalmysh is boıynsha sheshim qabyldanatyn bolady", - dep jaýap bergen edi İshki ister mınıstrligi QazTAG redaksıasynyń joldaǵan saýalyna.
