Qazaqstan jýyrda Qytaidyń bankaralyq obligatsiialar naryǵynda jalpy somasy 6,6 mlrd iýandy ($983 mln) quraityn «panda-obligatsiialardy» ornalastyrdy. Bul – Ortalyq Aziia elderi arasynda «panda-obligatsiialardy» bir rettik ornalastyrý kólemi boiynsha eń iri kórsetkish, dep habarlaidy Dalanews China Daily basylymyna silteme jasap.
Panda-obligatsiialar eki transhpen, atap aitqanda 1,82% jyldyq mólsherlemesine sáikes 5 mlrd iýan kóleminde 3 jyldyq obligatsiialar jáne 1,95% jyldyq mólsherlemesi boiynsha 1,6 mlrd iýan kóleminde 5 jyldyq obligatsiialar shyǵaryldy.
China International Capital Corp mámileniń negizgi uiymdastyrýshysy ári býkranneri boldy. Industrial and Commercial Bank of China, China Construction Bank, Bank of China jáne Export-Import Bank of China – mámileniń birlesken uiymdastyrýshylary ári birlesken býkrannerleri. Qazaqstan tarapynan mámileniń jalǵyz jergilikti menedjeri Teniz Capital Investment Banking kompaniiasy boldy.
Mamyr aiynda jalpy somasy 3,4 mlrd iýan bolatyn alǵashqy táýelsiz panda-obligatsiialar sátti ornalastyrylǵannan keiin, bul jolǵy ornalastyrý Qazaqstannyń Qytaidaǵy panda-obligatsiialar naryǵyna qaita oralǵanyn bildiredi.
Eki ornalastyrýdyń jiyntyq kólemi 10 mlrd iýandy qurady. Bul qadam Qytai men Qazaqstan arasyndaǵy qarjylyq yntymaqtastyqty tereńdetý, eki eldiń kapital naryqtarynyń ózara bailanysyn damytý jáne iýannyń internatsionaldanýyn odan ári ilgeriletý turǵysynan mańyzdy.
Bank of China ókilderiniń aitýynsha, panda-obligatsiialardy sátti ornalastyrý Qytaidyń kapital naryǵy álem elderiniń táýelsiz qarjylandyrýy úshin joǵary tartymdylyqqa ie ekenin kórsetedi. Sonymen qatar bul jahandyq qarjylandyrý valiýtasy retinde iýannyń halyqaralyq yqpalyn odan ári nyǵaitýǵa yqpal etedi.
