AQSh-tyń Chikago qalasynda federaldy prokýrorlar Medicare jáne meditsinalyq saqtandyrý baǵdarlamalaryna qatysty aýqymdy alaiaqtyq shemalaryn uiymdastyrdy degen kúdikpen birneshe shetel azamatyna aiyp taqty, dep habarlaidy Dalanews.kz cwbchicago.com basylymyna silteme jasap.
Tergeý dereginshe, bul shemalar saldarynan memlekettik baǵdarlamalar men jeke saqtandyrý kompaniialary 1 mlrd dollardan astam qarjydan qaǵylǵan. Alaiaqtyq meditsinalyq jabdyqtar men diagnostikalyq testilerge jalǵan ótinimder berý arqyly júzege asqan, alaida bul qyzmetter patsientterge is júzinde kórsetilmegen.
Federaldy aiyptaý qorytyndylarynyń birinde Qazaqstan azamaty Anýr Abdrahmanov Medicare baǵdarlamasy aiasyndaǵy alaiaqtyq operatsiialardan túsken qarajatty zańdastyrý maqsatynda sóz bailasqany úshin aiyptaldy.
Tergeý nusqasyna sáikes, Abdrahmanov Kentýkki shtatynda tirkelgen Priority One Medical Equipment kompaniiasyn baqylaýyna alyp, ony Medicare baǵdarlamasyna jalǵan ótinimder berý úshin paidalanǵan. 2024 jyldyń naýryz–tamyz ailary aralyǵynda kompaniia arqyly úzdiksiz gliýkoza monitoringi qurylǵylary men kateterlerge qatysty shamamen 666 mln dollar kóleminde ótinim joldanǵan. Alaida bul meditsinalyq buiymdar patsientterge jetkizilmegen.
Sot materialdaryna sáikes, Abdrahmanov AQSh-qa 2023 jyldyń mamyrynda maýsymdyq jumys vizasymen baryp, onyń merzimi sol jyldyń qyrkúieginde aiaqtalǵanyna qaramastan, elde qala bergen. 2024 jyldyń sáýirinde ol kompaniianyń burynǵy iesi biznesin satqannan keiin Priority One-nyń múshesi ári basqarýshysy bolǵan.
Tergeýshilerdiń málimetinshe, 2024 jyldyń mamyr–tamyzy aralyǵynda Medicare júiesine Priority One kompaniiasyna qatysty 250-ge jýyq shaǵym túsken. Kóptegen azamattar eshqandai taýar nemese qyzmet almaǵanyn aitqan. Illinois shtatyndaǵy alty Medicare alýshy ózderine gliýkoza monitoringi qurylǵylary men kateterler berildi degen aqparatty joqqa shyǵaryp, tipti diabetpen aýyrmaitynyn málimdegen.
2024 jyldyń shildesinde tergeýshiler kompaniianyń Kentýkkidegi keńsesin baqylaý kezinde onyń bos ári jabyq turǵanyn anyqtaǵan. Keńsedegi jaldamaly qyzmetkerlerdiń aitýynsha, olardyń jalǵyz mindeti – poshtany jinap, ony Telegram messendjeri arqyly buryn-sońdy júzbe-júz kórmegen basshysyna joldaý bolǵan.
Sot qujattarynda bir qyzmetkerdiń chekterdi FedEx arqyly Chikago mańyndaǵy mekenjailarǵa jibergeni kórsetilgen. Sol qyzmetkerdiń biri Priority One atyna jazylǵan 1 mln dollarlyq chekti joǵaltyp alyp, keiin tapqany úshin 2 myń dollar syiaqy alǵanyn aitqan.
Shaǵymǵa sáikes, 2024 jyldyń shildesinde Medicare Priority One-ǵa tólemderdi toqtatqanyna qaramastan, qosymsha saqtandyrý usynatyn Medigap kompaniialary jalǵan ótinimder boiynsha keminde 450 myń dollar tólegen. Qarjylyq qujattar Abdrahmanovtyń keiin 182 myń dollardy Gonkongtaǵy shottarǵa aýdarǵanyn, sondai-aq 200 myń dollardan astam qarjyny basqa sheteldik esepshottarǵa jiberýge talpynǵanyn kórsetedi.
2024 jyldyń tamyzynda tergeýshiler Abdrahmanovty Priority One-nyń bank shotyna Medigap saqtandyrý kompaniialarynan túsken shamamen 22,5 myń dollar kólemindegi 30-ǵa jýyq chekti salyp jatqan jerinen ustaǵan.
Bul iste taǵy bir Qazaqstan azamaty – Tair Smaǵýl da aiyptaldy. Chikago mańynda turatyn Smaǵýl Medical Home Care Inc. kompaniiasyna qatysty Medicare baǵdarlamasyndaǵy iri alaiaqtyqtan túsken qarajatty zańdastyrý maqsatynda sóz bailasqan dep kúdiktelip otyr.
Federaldy biliktiń málimetinshe, 2023 jyldyń jeltoqsanynan 2024 jyldyń qyrkúiegine deiin Smaǵýl kompaniiany baqylap, ulttyq deńgeidegi alaiaqtyq shemaǵa qatysqan. Bul shema aiasynda Medicare jáne Medigap saqtandyrý kompaniialaryna meditsinalyq qajettiligi joq nemese múlde jetkizilmegen kateterler men ózge jabdyqtar úshin shottar usynylǵan.
Aiyptaý aktisine sáikes, Medical Home Care 2023 jyldyń mamyry men 2024 jyldyń maýsymy aralyǵynda kateterlerge qatysty 470 myńǵa jýyq ótinim berip, olardyń jalpy somasy shamamen 953 mln dollardy quraǵan. Osy kezeńde Medicare júiesine kompaniiaǵa qatysty 27 377 shaǵym túsken.
Tergeý barysynda Medicare alýshy 19 adamnan jaýap alynǵan, onyń ishinde Illinois shtatyndaǵy bes turǵyn bar. Olardyń barlyǵy ózderine atalǵan meditsinalyq buiymdar jetkizilmegenin aitqan. Al kateterlerdi taǵaiyndady dep kórsetilgen úsh meditsina qyzmetkeri mundai taǵaiyndaýlar bolmaǵanyn jáne atalǵan azamattardyń óz patsientteri emes ekenin málimdegen.
Qarjylyq qujattarǵa sáikes, 2024 jyldyń qańtar–aqpan ailarynda, Smaǵýl kompaniiany baqylap otyrǵan kezeńde, Medigap saqtandyrý kompaniialary Medical Home Care-ge keminde 854 080 dollar tólegen. Tergeýshiler Smaǵýldyń bul qarajatty Illinois shtatyndaǵy bankomattar arqyly birneshe ret qolma-qol sheship alyp, keiin kompaniianyń bank shottaryn jaýyp, alaiaqtyq jolmen alynǵan chekti jeke esepshotyna aýdarǵanyn aitady.
Bul iste Pákistan azamattary – Býrhan Mirza men Kashif Ikbal da aiyptalýda. Tergeý nusqasyna sáikes, olar jalǵan ótinimder arqyly Medicare jáne ózge de densaýlyq saqtaý baǵdarlamalarynan 10 mln dollar tóleýge májbúrlegen shema uiymdastyrǵan. Aiyptaý materialdarynda Ikbalǵa federaldy tergeýshilerge jalǵan málimet bergen degen aiyp ta taǵylǵan.
