Qyzylordada óz balalaryn tunshyqtyryp óltirgen áielge qatysty jańa derekter aityldy. Eki balasyn óltirgen áiel jaily onyń tanystary "Kóremiz" baǵdarlamasynda aityp berdi, - dep habarlaidy Dalanews.kz.
Kúdikti kelinshek Shieli aýdanynda týǵan. Joǵary oqý ornyn bitirgen soń 10 jyldai ustazdyq qyzmet atqarǵan. Mektep ákimshiligi, oqýshylardyń ata-anasy, áriptesteri, kórshileriniń sózinshe, ol oqýshylarmen tez til tabysatyn, ata-analarmen qarym-qatynasy jaqsy, aqjarqyn minezdi eken. Maqtaý men madaqtaý qaǵazy kóp kelinshek-otbasyndaǵy jalǵyz perzent. 25 jasynda turmysqa shyqqan kelinshektiń 2 balasy bolǵan.
Sumdyq oqiǵa bolmas buryn ol áleýmettik jelige eki balasy men óziniń qolyn sýretke túsirip, "júrekterimiz máńgi birge" dep jazba qaldyrǵan.
Kelinshek jantúrshigerlik qylmysty jasaǵannan keiin jasyrynbaq bolyp túnegen Shymkenttegi qonaq úi qyzmetkerleri "ol munda kelgen joq" dep at-tonyn ala qashty. Al ony qalai ustap áketkenin kórgen qala turǵyndarynyń biri áiel qylmys jasaǵan adamǵa uqsamaǵanyn aitty.
"Kórdim, biraq ne úshin áketip bara jatqanyn túsinbegen em. Keiin internetten kórdim. Qońyr tústi shýba kiip alǵan, túri ýaiymdap bara jatqan adamǵa uqsamady", – dedi turǵyndardyń biri.
Al áieldiń kórshileri tyń derekti jariia etti. Olardyń aitýynsha, qyzdyń derti bolǵan.
"Stýdent kezde aýyryp, moldalarǵa aparyp, qazaqy em-dom jasaǵan. Sodan keiin jaqsy bop ketkenimen, aldyńǵy jyly qaitadan derti asqynǵan eken. Uiyqtap jatyp bir jaqqa ketip qap, keiin taýyp alyp kelipti degendi estidik", - deidi kelinshek týǵan aýyldyń turǵyndary.
Al emhana qyzmetkerleri dispanserlik esepte turmaǵanyn, tek júktilik kezde baqylaýda bolǵanyn aitty. Kelin bop túsken jerinde kórshiles turatyn turǵyndar ata-enesi de, kúieýi de óte jaqsy adamdar deidi.
"Jumystan kelip, balalardy balabaqshadan alyp ketken. Úi ishi keshke kelmegennen keiin izdei bastaǵan. Kúieýi jumystan 11-12-ler shamasynda kelse, ketip qalǵan eken. Birinshi qurbysyna jazyp, "meni alyp ketińdershi" dep ornalasqan jerin jiberipti. Qurbysy kelinshektiń kúieýine habar berip, úsh adam bolyp sol jaqqa barǵan. Sol kezde sumdyq oqiǵa bolǵanyn bilgen", –deidi kórshileriniń biri.
Kúdiktiniń Láila esimdi týysy onyń burynnan aýytqýy bar ekenin, kishirek kezinde birneshe ret ózine qol jumsamaq bolǵanyn aitty. Al qaiyninisi jubailar arasynda múldem urys-keris bolmaǵan deidi. Sózinshe, ne jaǵdai bolǵany ózderine de jumbaq bolyp otyr.
"Ishken eken, urys-keris bolǵan eken, aýytqýy bar degenge senbeńizder. Onyń bári – jalǵan", – dedi ol.
Eske sala keteiik, biyl 7 aqpanda Túrkistan qalasynyń jaldamaly páterleriniń birinen eki kishkentai balanyń denesi tabyldy. Keibir málimetter boiynsha olardy anasy jastyqpen tunshyqtyryp óltirgen.
Osy fakt boiynsha qylmystyq is qozǵaldy. Ólimniń sebebin anyqtaý úshin balalardyń denesi saraptamaǵa joldandy.
