Sońǵy kezde jelide eGov.kz portaly reseılik mamandardyń qolyna ótetinin týraly aqparat qyzý talqylanyp jatyr. Soǵan baılanysty Mýsın Qazaqstanda kóptegen mekeme negizi shetelde qalanǵan platforma boıynsha jumys isteıtinin aıtty. Alaıda bul jasap shyǵarýshy tarap barlyq aqparatqa qol jetkize alady degendi bildirmeıdi.
"Egov portaly tek qana Qazaqstanǵa tıesili jáne eshkimge berilmeıdi! "Qazaqstandyqtardyń barlyq deregi Reseı Federasıasyna qoljetimdi bolady" degen túsinik qısynsyz. Elektrondyq úkimette bireý bireýge aqparat beredi degen suraqtyń týyndamaýy da kerek", - dep jazdy Mýsın.
Mınıstrdiń sózinshe, eGov-taǵy baza ne júıege eshkim eshqashan qol jetkize almaıdy.
"Ótken aıda bastalǵan taldaý qazaqstandyq memlekettik sektorda 400+ aqparattyq júıe bar ekenin kórsetti. Bul memlekettik jyljymaıtyn múlik bazasy sıaqty iri bazalardan bastap, olımpıada júldegerleri tirkelgen shaǵyn bazalarǵa deıingi aralyqty qamtıdy. Bizdiń qazirgi mindetimiz – ártúrli tehnologıalarda jazylǵan júzdegen júıeniń ornyna barlyq derek biryńǵaı platformada jınaqtalǵan jáne túsinikti bolatyn ondaǵan júıege ótý", - deıdi ol.
Qazir eGov-ty eski júıeden shyǵaryp, ornyna sapaly zamanaýı tehnologıamen jabdyqtalǵan platformany ornatý mindeti tur. Mınıstrdiń sózinshe, halyq úshin de, ekonomıka úshin de jaqsy nátıjege qol jetkizý úshin sıfrlandyrýdyń jan-jaqtan quralǵan modeliniń ornyna tutas platformaǵa ótetin kez keldi.
"IT salasyndaǵy kez kelgen sheshim, ásirese halyqaralyq sheshim kıber qalqan men azamattardyń múddesin qorǵaý jónindegi ýákiletti organdardyń usynysyn eskerip qabyldanady. Qazaqstan tarapy baǵdarlamalyq qamtamasyz etý men tehnıkalyq qoldaýdy talap etetin vendor sıaqty bolýy kerek degen talap qoıyp otyrmyz. Sber qoljetimdi bolyp, barlyq komponenttiń bastapqy kodyn kórsetedi jáne barlyǵyn Qazaqstandaǵy serverlerge ornalastyrady", - deıdi mınıstr Mýsın.
Al bul jumysqa bólingen 500 mıllıon teńgeniń barlyǵy Sber-ge jumsalmaıdy.
"Memorandým degen kelisimshart emes. Úkimet sıfrlyq transformasıa múmkindigin qarastyratyn memorandýmǵa qol qoıdy, onyń baǵalaý quny shamamen 500 mıllıon teńge. Atalǵan somanyń bir bóligi jergilikti IT naryǵyna ınvestısıalanady. Bul qarajatty qazaqstandyq kompanıalar platformalyq tásildi engizý boıynsha jumsaıdy. Somanyń bir bóligi ınfraqurylymdyq sheshimderge ketse, bir bóligi ǵana Sber-den sheshimniń ózin satyp alýǵa jumsalady", - dep túsindirdi ol.
Platformalyq modeldi engizýge Qazaqstannyń IT kompanıalary mindetti túrde qatysady.
Platformalyq modeldi engizýdiń tanystyrylymy men talqylaýy qoǵam belsendileri men IT naryq ókildirinen turatyn saraptamalyq komısıanyń qatysýymen ótedi.
Al Sber platformanyń qalaı jumys isteıtinin kórsetedi, mamandardy oqytady. Sodan keıin ǵana platformada jumys isteý bastalady. Bul jobany iske asyrýǵa qazaqstandyq IT kompanıalar jumyldyrylady.
3 qyrkúıekte Shyǵys ekonomıkalyq forýmy aıasynda Qazaqstannyń premer-mınıstri Asqar Mamın men Sberbank basqarmasynyń tóraǵasy German Gref yntymaqtastyq týraly memorandýmǵa qol qoıdy. Qujatqa sáıkes, reseılik kompanıa Qazaqstannyń memlekettik sektoryn sıfrlandyrý jónindegi jobalardy iske asyrýǵa qatysady.
