Qazaqstan halyqaralyq deńgeidegi taǵy bir kino jobanyń túsirilim alańyna ainaldy. Álemge áigili akter, rejisser ári prodiýser Djeki Chan Qazaqstanda túsiriletin “Qudiretti saýyt-saiman: Aqtyq sheshim” filminiń jumysyn resmi túrde bastady. Almatyda ótken jiynda jobanyń bas seriktesi Kaspi.kz kompaniiasy men shyǵarmashylyq top aldaǵy túsirilim jumystary týraly aitty, dep habarlaidy dalanews.kz.
Shara barysynda kompaniianyń basshysy ári teń quryltaishysy Mihail Lomtadze áigili akterge Kaspi Gold kartasyn tabystady.
Onyń aitýynsha, kompaniia úshin álemdik kino juldyzynyń jańa jobasynyń Qazaqstanda túsirilýine qoldaý kórsetý – úlken mártebe.
"Bul film elimizdi álemge jańa qyrynan tanytyp, Qazaqstanǵa halyqaralyq aýditoriianyń nazaryn aýdarýǵa múmkindik beredi. Djeki Chan Qazaqstanmen burynnan tanys. Biz onyń elimizdiń kúndelikti ómirin jaqynyraq sezinýi úshin Kaspi Gold tabystaýdy jón kórdik. Osy jobaǵa atsalysýǵa múmkindik bergen Sálem Entertainment pen Adal Investments kompaniialaryna alǵys aitamyz. Djeki Chan men shyǵarmashylyq topqa sátti túsirilim jáne shabyt tileimiz", – dedi Mihail Lomtadze.
Óz kezeginde Djeki Chan Qazaqstanǵa qaita kelgenine qýanyshty ekenin aityp, filmniń júzege asýyna úles qosyp jatqan barlyq serikteske rizashylyǵyn bildirdi.
"Qazaqstanǵa qaita oralǵanyma óte qýanyshtymyn. Eń aldymen Kaspi.kz, Sálem Entertainment, rejisserge jáne osy jobanyń júzege asýyna eńbek sińirgen barsha janǵa shyn júrekten alǵys aitamyn. Túsirilimniń bastalýyn asyǵa kútip júrmin. Bul – úlken jaýapkershilikti talap etetin jumys. Sonymen qatar mundai jobalar erekshe shabyt pen zor qýanysh syilaidy. Barshańyzǵa raqmet", – dedi akter.
"Qudiretti saýyt-saiman" – álem boiynsha birneshe býyn kórermenniń yqylasyna ie bolǵan áigili shytyrman oqiǵaly franshiza. Jańa filmde Djeki Chan somdaityn keiipkerdiń oqiǵasy jalǵasyn tabady.
Túsirilim jumystary Almaty jáne Mańǵystaý oblystarynda júrgizilip jatyr. Joba avtorlarynyń málimetinshe, bul oryndardy Djeki Chan 2025 jyldyń sońynda Qazaqstanǵa jasaǵan sapary kezinde ózi tańdaǵan.
Filmdi Sálem Entertainment pen Adal Investments kompaniialary júzege asyryp jatyr. Týyndynyń tusaýkeseri 2027 jyldyń aqpan aiyna josparlanǵan.
