Diplomattarymyz Túrkiiadaǵy azamattarǵa qaýipsiz orynda qalýdy eskertti
– Elshilik kúsheitilgen rejimde jumys istep jatyr, Ystambul men Antaliiadaǵy konsýldyqtar jumys istep jatyr. Keiin Qazaqstannyń Syrtqy ister ministrligi resmi túrde málimdeme jasaidy. Qazaqstan biligine Túrkiiadaǵy jaǵdai baiandaldy, Prezident habardar boldy, – dep habarlady syrtqy saiasi vedomstvonyń ókilderi.
Diplomattyń aitýynsha, Qazaqstan elshiliginiń qyzmetkerleri Túrkiiada júrgen qazaqstandyq azamattardy úiden shyqpaýyn eskertip jatyr. «Túrkiiada júrgenderge, barlyq stýdentke, jumys isteitinderge eskertý jasap jatyrmyz - barlyǵyna habarlaimyz, baqylaýda ustaimyz. Jaǵymsyz jaǵdaiǵa túsip qalmaýy úshin úiden shyqpaýyn eskertip jatyrmyz», – dedi elshilik qyzmetkeri.
Eske salaiyq, 15 shildede Túrkiiada áskeriler memlekettik tóńkerilis jasaýǵa árekettendi. Atystar týraly birinshi habar Astana ýaqyty boiynsha 01.00-de jetken. Halyqaralyq agenttikterdiń málimetinshe, Ankarada atystar estilgen, qala ústinde joiǵysh ushaqtar men tikushaqtar ushyp júr, al Ystambuldaǵy áýejaiǵa tankter jetkizilgen. Elde memlekettik telearnaral habar taratýyn toqtatty. Ankarada Facebook jáne Twitter áleýmettik jelileri qulyptaldy.
