Qylmys áleminiń serkesi Arman Jumageldiev - Dikii Armannyń uiymdasqan qylmystyq tobynan qorlyq kórgen qazaqstandyq azamat oqiǵasyn bólisti, - dep habarlaidy Dalanews.kz.
Bul týraly ol "Júie" YouTube-arnasyna bergen suhbatynda aitty. Jeke qaýipsizdigin saqtaý maqsatynda qupiia áńgimelesken jigit oqiǵa 2 jyl buryn bastalǵanyn aitady.
"Dosym ekeýimiz kólik satyp, tirlik istep júrdik. Bir kúni qylmystyq toptyń bir múshesi kelip, satylmai turǵan úiin bizge satqysy keldi. Biraq ol kezde bizde aqsha bolmady. Bizde 2-3 kólik boldy, alaida ol kólik retinde almaitynyn, tek qolma-qol aqsha berýimizdi talap etti", - deidi qupiia azamat.
Ol qoqan-loqy kórsetken jigittiń atyn da aitty. Osylaisha "Dikii Armannyń" adamy - Arman Sartaev úiin 42 million teńgege satyp alýdy talap etken. Alaida olar mundai aqsha joq ekenin aitqanda "kólikterińdi satyp, úidiń aqshasyn keiin beresińder" degen.
"Biz "joq" dep te úlgermei qaldyq. Aqshany daiyndaýǵa bizge bes ai ýaqyt berip, úidi bizdiń atymyzǵa aýdaryp tastady. Ol ai saiyn 1-2 millionnan alyp júrdi. Osylaisha 7 millionǵa deiin alyp júrip, qalǵan 35 milliondy keiin beresińder dedi. Biraq 2,5 aidan keiin kelip, "aqsha kerek bolyp jatyr, qalǵan aqshany taýyp berińder" dep talap qoidy. Dosymnyń anasyna baryp, jaǵdaidy túsindirdik, ol bizdi túsinip, 35 million teńgeni berdi. Arman Sartaevty shaqyryp, aqshasyn berip, qolhat aldyryp aldyq. Ol Dikii Armannyń adamy bolǵandyqtan qoryqtyq.
Arada bir apta ótip, Dikii Armannyń adamy qaitadan habarlasty. Men ol kezde Almatyǵa kólik satýǵa kelgenmin. Qalada tamaqtanyp, úi jaqqa kele jatsam, meni úidiń aldynda kútip tur eken. Úige kirgende maǵan 7 million teńge beresiń dedi. Sebebi áieli ekeýi janjaldasyp qalǵan eken, al ol áieliniń úii bolǵan. Ol "bul meniń úiim" dep 7 million teńgeni taýyp kel degen eken. Men ondai aqsha joǵyn, bastapqyda alyp júrgen 7 millionyn úidiń baǵasynan alyp tastaýǵa keliskenimizdi aittym. Ol meni múgedek qylyp qoiatynyn, aiaǵymdy syndyratynyn aitty. Qoqan-loqy bastaldy. Ol menen aqshany almai ketpeitinin túsindim, keiin kóligimdi alýyn usyndym, biraq ol kónbei, birge Shymkentke baryp, kólikti satyp, aqsha berýimdi talap etti. Men ol kólikti tanysymnan 13 millionǵa satyp alǵanmyn. Qaitadan sol tanysyma baryp, qaityp alshy kólikti dedim. Ol 6,8 million ǵana baryn aitty. Men ol aqshany alyp, Arman Sartaevqa berdim. Iaǵni 7 millionnan eki ret bergenmin", - deidi qorlyq kórgen azamat.
Ol osymen sharýa bitti dep oilaǵan. Alaida bir kúni kafede tamaq iship otyrǵan jerinen dosy ekeýiniń áldekimder jaǵasynan ustap, alyp shyǵyp ketken.
"Meni qonaqúige aparyp, moinyma pyshaq taqap, kólik satatyn saittan maǵan quny 6,2 million dep turǵan Toyota Camry-dy kórsetip,"eki kúnniń ishinde kólik meniń astymda bolsyn" dedi. Men ne isterimdi bilmei Almatyǵa qashyp kettim. Úide jatqan jerimde eki jigit kelip, meni oiatyp, Otarǵa alyp ketti. Arman Sartaev meniń nómirimdi ańdý úshin quzyrly organdarǵa 500 myń teńge bergen", - deidi qorlyq kórgen azamat.
Osylaisha o basta talap etken aqshasyn 20 million etip qaitarý keregin aitqan. Qupiia azamattyń sózinshe, Dikii Armannyń onǵa jýyq adamy aqsha talap etip júrgen.
"Men saǵan ana adam tiispeitindei etip beremin" dep 3 million suraidy. Ol sózderdi elemesem meni uryp ketetin", - deidi qupiia azamat.
Eske salaiyq, buǵan deiin Almaty oblysynyń turǵyny Raihan Aiazbaeva halyqaralyq izdeýde júrgen qylmysker "China Alban" - Shyńǵys Muqashevtan ulyn arashalap berýdi suraǵan bolatyn.
Keibir derekter boiynsha, China Alban - Dikii Armannyń qylmystyq tobyndaǵy adam.
"Meniń ulym Baqytjan Muhamedjannan China Alban eki jyldan beri aqsha bopsalap júr. Jaqynda "Chinanyń" tobyndaǵy tórt adam ulymdy kezdesýge aldap shaqyryp, taýǵa aparyp, uryp-soǵyp, namysyna tietin videolar túsirgen. Ol videolardy áleýmettik jelige júkteimin dep aqsha bopsalady. Balamnyń abyroiy tógilmesin dep, qoryqqanymyzdan "Chinaǵa" apta saiyn 200 myńnan 1 millionǵa deiin berdik. Qazirgi tańda úiimizdi satyp, dalada qaldyq", - deidi Raihan Aiazbaeva.
Sonyń ózinde Shyńǵys Muqashev Túrkiiada júrip qorqytýyn toqtatpaǵan.
"Aqsha jibermeimiz desek barlyq videony áleýmettik jelide paraqsha ashyp, Tiktok-qa salǵan. Almaty oblysy ishki ister departamentiniń politsiia maiory Maqsat Ihsanov myrzanyń kómegine júgindik. Ol ulymdy taýǵa aparyp, qinaǵan qylmyskerlerdi ustaýǵa kómektesti. Videolar áleýmettik jelige salynǵannan keiin ulym "anam kórmesinshi, videolardy óshirip tastaýǵa kómektesińizshi" dep Maqsat Ihsanovtan kómek suraidy. Ol Muqashevqa habarlasyp, videolardy jeliden alyp tastaýyn suraidy.
Al Muqashev telefon áńgimesin videoǵa túsirip, Ihsanov qylmyskerdiń sózin sóilep otyr dep jala jaýyp, jelige salyp jibergen. Sonymen qatar, ulyma tórt qylmyskerdi bosat dep qysym kórsetip jatyr. Muqashevtiń kesirinen Ihsanov Maqsat myrza jumysynan aiyrylý ústinde. Biz sharasyz kúidemiz", - deidi Raihan Aiazbaeva.
