Differentsialdy tarif engizilgen óńirlerdiń tutynýshylarynyń basym bóligi sýǵa joǵary tarifpen tólem jasaidy. Bul týraly Májilis qabyrǵasynda Sý resýrstary jáne irrigatsiia ministri Nurjan Nurjigitov málim etti, dep habarlaidy Dalanews.kz.
"Sýdy únemdi paidalanýdy yntalandyrýda tariftik saiasat mańyzdy ról atqarady. Osyny eskere otyryp, biz tarifterdi qalyptastyrýdyń jańa ádistemesin ázirleýdemiz, ol dándi-daqyldar túrine, sýdy tutyný kólemine jáne sý únemdeý tehnologiialarynyń bolýyna bailanysty differentsialdy tarifti qarastyrady", – dedi ministr Nurjan Nurjigitov Májilistegi Úkimet saǵatynda.
Ol elimizdiń keibir óńirinde "az tutynsań – az tóleisiń" degen qaǵidatqa negizdelip, aýyzsýǵa differentsialdy tarifter engizilgenin eske saldy. Máselen:
- I top - bir adamǵa aiyna 3 tekshe metrge deiin sý, qoldanystaǵy tarif qoldanylady (halyqtyń 49%-y tutynady);
- II top - bir adamǵa aiyna 3-ten 5 tekshe metrge deiin sý, qoldanystaǵy tariftiń +20%-y ústemelenedi (halyqtyń 20%-y tutynady)
- III top - bir adamǵa aiyna 5-ten 10 tekshe metrge deiin sý, qoldanystaǵy tariftiń +50%-y ústemelenedi (halyqtyń 20%-y tutynady);
- IV top - bir adamǵa aiyna 10 tekshe metrden astam sý nemese eseptegish quraly ornatylmaǵan jaǵdaida, qoldanystaǵy tariftiń eki eselengen kólemi (halyqtyń 11%-y solai tutynady).
Aldyn ala málimetter boiynsha, Almaty, Shymkent, Aqtóbe, Aqmola, Túrkistan, Ulytaý oblystarynda differentsialdy tarifterdi engizý ai saiyn orta eseppen 1,6 mln tekshe metr sýdy únemdeýge múmkindik berdi. Túsken qarajattyń 900 mln teńgesi jelilerdi jańartýǵa baǵyttalady.
