Aldymen barsha jurt D.Qonaevtyń týǵanyna 113 jyl tolýyna orai, eskertkishine gúl shoqtaryn qoidy. Keiinnen Mádeniet úiinde memleket jáne qoǵam qairatkerin eske alý keshi ótti.
Sharaǵa qala ákimi Ashat Berdihanov qatysyp, D.Qonaevtyń ór tulǵaly azamat bolǵany jaiynda mańyzdy derekterge toqtaldy.
«Búgin biz úshin erekshe kún. Sebebi, dál osy kúni, 1912 jyldyń 12 qańtarynda qalamyzǵa esimi berilgen elimizdiń dańqty perzenti, memleket jáne qoǵam qairatkeri Dinmuhamed Ahmetuly Qonaev dúnie esigin ashty. Qonaev atamyz el basqarǵan jyldary keń baitaq qazaq jerinde 68 jumysshylar kenti men 43 qala salyndy. Ol Ile ózeniniń boiyna bógen saldyryp, jańa sý elektr stansasynyń boi kóterýine, osy mańda jańa Qapshaǵai qalasynyń irgetasy qalanýyna eńbek sińirdi», - dedi Ashat Berdihanov.
Sodan keiin áleýmettik osal toptaǵy otbasylarǵa jáne kezekte turǵan azamattarǵa 80 páterdiń kilti tabys etildi.
Shaǵyn kontserttik baǵdarlamadan soń, shahar basshysy búgin baspanaly bolǵan eki otbasynyń úiine baryp, quttyqtap shyqty.
«Ózim kópbalaly anamyn, 7 balam bar. Úi kezeginde 17 jyldan beri turǵanmyn. Búgin atamyzdyń týǵan kúninde jaqsy jańalyq bolyp, úige qolymyz jetti. Qýanyshtymyn! Áleýmettik osal toptaǵylardy, kópbalaly analardy, jetimder men ardagerlerdi qoldap júrgen memlekettik qyzmetkerlerge alǵysym sheksiz», – dedi úi iesi Nazym Ahmetova.
Aita keteiik, páterler jekeshelendirý quqyǵynsyz jalǵa berildi. Jalǵa alý quny - qoljetimdi. Byltyr Qonaevta 85 otbasyǵa páter kilti tabystalǵan bolatyn.
