Qaiyrshaqty aýyldyq okrýginde 15 657 adam nemese 5004 otbasy turady. Okrýgke Tomarly, Talǵairań, Besikti aýyldary, Standart jáne Aspa ýchaskeleri, Juldyz, Juldyz-3, Kóktem yqsham aýdandary kiredi.
Aldymen óńir basshysy aýyl turǵyndaryn jeke suraqtary boiynsha qabyldady. Máselen, qabyldaýǵa kelgen turǵyn Sálimjan Amanǵaliev Tomarly aýylyna mektep salý máselesin qozǵady.
Aimaq basshysy Mahambet Dosmuhambetov atalǵan nysan úshin Kóktem yqsham aýdanyndaǵy 600 oryndyq mektep qurylysy salý úshin qujat jasaqtalyp, saraptamadan ótkenin jetkizdi.
– Keshendi jospar aiasynda respýblikalyq biýdjetten qarjylandyrýǵa usynys berildi. Sonymen qatar, Juldyz-3 yqsham aýdanyndaǵy 600 oryndyq mektep qurylysynyń qujaty daiyn. Bul mekteptiń qurylysyn TShO mekemesi salý úshin usynys engizildi, – dedi oblys ákimi Mahambet Dosmuhambetov.
Sondai-aq, aýyl turǵyny, zeinetker Orynbasar Raisov okrýgke qarasty aýyldar ishine kóshe jaryǵyn júrgizý men eldi mekenderdegi eski elektr jelileri men baǵanalaryn aýystyrýǵa ótinish bildirdi.
Óńir basshysy biyl memlekettik jekeshelik áriptestik negizinde okrýg boiynsha 30,7 shaqyrym bolatyn 31 kóshege jaryqtandyrý qurylysyn bastaý josparlanǵanyn aitty.
Budan keiin aimaq basshysy okrýgtiń turǵyndarymen kezdesti. Tomarly Mádeniet úiinde ótken kezdesý barysynda atqarylǵan jumystar týraly baiandama jasaǵan okrýg ákimi Shaphat Qaliev aýyldarda máseleler birtindep sheshimin taýyp jatqanyn atap ótti.
– 2021 jyly Talǵairań-2 aýylynyń jalpy uzyndyǵy 8,8 shaqyrym bolatyn 15 kóshesine jol qurylysy men jaiaý júrginshiler joly tolyqtai aiaqtalyp, paidalanýǵa berildi, –degen okrýg ákimi, kósheni jaryqtandyrý boiynsha áli de birqatar jumys kútip turǵanyn aitty.
Jiynda turǵyndar tarapynan birqatar saýal qoiylyp, usynystar berildi. Azamattar aýyldaryna jaiaý júrginshiler jolyn salý, kóshe jaryǵyn júrgizý, eski elektr baǵanalaryn aýystyrý, mektep, balabaqsha, dene shynyqtyrý kesheni men saz mektebin salý máselelerin qozǵady.
Sondai-aq, turǵyndar úshin ózekti másele bolyp kele jatqan – baý-baqsha úshin berilgen jerdiń paidalaný maqsatyn turǵyn jaiǵa aýystyrý máselesi de alǵa tartyldy.
– Kezinde jerdi baý-baqsha, egin egý úshin bergen eken, ony dál qazirgi sátte maqsatyn ózgertý múmkin emes. Aldaǵy ýaqytta jan-jaqty zerdelep, zań sheńberinde bir sheshim shyǵarý jaǵyn qarastyrý kerek, – dedi aimaq basshysy.
Turǵyndardyń saýaldaryna jaýap bergen óńir basshysy Mahambet Dosmuhambetov, kótergen saýaldardyń árqaisysy mańyzdy ekenin aita kelip, áli de sheshimdi qajet etetin máseleler boiynsha jaýapty organ basshylaryna birqatar tapsyrma berdi.
Kezdesý bastan aiaq áleýmettik jelidegi okrýgtiń resmi Feisbýk jáne Instagram paraqshalarynan tikelei efirde kórsetildi.
Atap óterligi, oblys ákimimen kezdesýdiń ótetindigi aldyn ala buqaralyq aqparat quraldary men áleýmettik jelilerde jariialanyp, turǵyndar qulaqtandyryldy. Turǵyndardyń oblys ákimine qoiatyn suraqtary men usynys-pikirlerin jinaqaý úshin ákim apparaty men aýyldyq klýb ǵimarattaryna arnaiy jáshikter ornatylǵan bolatyn.
Aita keteiik, turǵyndarmen kezdesýge aimaq basshysymen birge oblystyq máslihattyń hatshysy Álibek Náýtiev, Atyraý qalasynyń ákimi Meiirim Qalaýi sondai-aq oblystyq basqarma basshylary men tiisti memlekettik organ ókilderi de qatysty.
