Qoǵam qairatkeri, saiasattanýshy, sondai-aq Jer reformasy boiynsha komissiia múshesi (kelisim boiynsha) Dos Kóshim aýyl sharýashylyq jerlerin qazaq azamattary ózderi-aq igerip kete alady dep sanaidy. Bul týraly Kazinform aqparattyq agenttigi habarlaidy.
«Birinshi másele, jańa bizdiń Jaqsylyq (Úshkempirov) aǵamyz, Temirhan aǵamyz, Saýer myrzalar, taǵy da basqa adamdardyń aitýyna qaraǵanda, olardyń sózin tyńdaǵannan keiin men jerdi sheteldikterge satpaý kerek eken degen sózdiń durys ekendigin uqtym. Agroónerkásip salasyndaǵy adamdardy shaqyrǵan uiymdastyrýshylarǵa rahmet. Osyndai adamdar bar, erteń Jaqsylyq aǵamyzdyń artynan júzdegen qazaqtyń jigitteri keledi, olar dál osyndai tamasha óndiris oryndaryn ashady, jerdi óńdeidi, joq álde basqa eldiń azamattarynyń qolynan keletin is pe bul?! Mine, kórip otyrmyz. Sondyqtan osy máseleni talqylaýdyń da qajeti joq. Osy jerdegi jigitterdiń barlyǵy aitty, qolymyzdan keledi, jasai alamyz. Tek qana mynadai, mynadai kómek kerek dedi jas jigitter. Sondyqtan osy máseleni talqylaýdyń qajettiligi de joq», — dedi ol búgin Jer reformasy boiynsha komissiianyń alǵashqy otyrysynda.
Saiasattanýshynyń oiynsha, qazirgi jer reformasyna qatysty daý-damai túsinbeýshilikten týǵan másele. Ony sheshý úshin aldymen halyqtyń bilikke degen senimin arttyrý qajet.
Aita keteiik, búgin Astanada Jer reformasy boiynsha komissiianyń alǵashqy otyrysy ótýde. Komissiia QR Prezidenti N.Nazarbaevtyń tapsyrmasymen qurylǵan bolatyn. Bunyń aldynda, Memleket Basshysy halyq arasynda daý týdyrǵan Jer Kodeksiniń birqatar túzetýlerine moratorii jariialaǵan.
Komissiia tóraǵasy bolyp QR Premer-Ministriniń Birinshi orynbasary Baqytjan Saǵyntaev, onyń eki orynbasary — «Nur Otan» partiiasynyń birinshi orynbasary Muhtar Qul-Muhammed pen ekinshi orynbasary (kelisim boiynsha) «Jaqsylyq» sharýa qojalyǵynyń basshysy, qoǵam qairatkeri Jaqsylyq Úshkempirov bolyp bekitildi.
Aita keteiik, jańadan qurylǵan Qazaqstan Respýblikasynyń Aqparat jáne kommýnikatsiialar ministri Dáýren Abaev ta komissiia quramynda.
Sonymen qatar, «Bolashaq» jastar qozǵalysynyń jetekshisi Dáýren Babamuratov (kelisim boiynsha), «Qazaqstandaǵy parlamentarizmdi damytý qory» qoǵamdyq qorynyń prezidenti Záýresh Battalova (kelisim boiynsha), saiasattanýshy Aidos Sarym (kelisim boiynsha)Bolathan Taijan qorynyń prezidenti Muhtar Taijan (kelisim boiynsha), Jalpyulttyq sotsial-demokratiialyq partiiasynyń tóraǵasy Jarmahan Tuiaqbai (kelisim boiynsha), «Jalyn» jýrnalynyń bas redaktory Muhtar Shahanov (kelisim boiynsha) jáne taǵy basqa adamdar komissiia quramyna endi.
