Aýyr atletikadan álem chempionatynyń kúmis júldegeri Almas Óteshov sportshylardyń doping qabyldaýy týraly aitty. Onyń sózinshe, qazir qamaýda otyrǵan Talǵat Ermegiiaevtiń kezinde doping qabyldaǵan sportshylar jarysqa ońai shyǵyp júrgen. Sebebi Ermegiiaev halyqaralyq aýyr atletika federatsiiasymen kelisip qoiatyn kórinedi, - dep habarlaidy Dalanews.kz.
Aita keteiik, Talǵat Ermegiiaev 2011-2012 jyldary aralyǵynda Týrizm jáne sport ministri bolǵan.
Óteshov aýyratletterdiń doping qabyldaityny ras ekenin aitty.
"Jalpy doping degen dári joq. Aspirin ishseń de ol doping bolyp sanalady. Doping - jalpy ataýy. Bárin salady. Doping politsiiasy men bizdiń ministrlik kelisedi. Bári aqshaǵa bailanysty. Olar bizdi tekserýge keledi. "Dvoinik" degen nárse bolady. Meniń "dvoinigim" Aidos degen inim boldy. Meniń ornyma qan tapsyrady. Sebebi bári kelisilip qoiǵan. Ilia Ilinniń ornyna aǵasy Aleksei tapsyrady. Bári jemqorlyq qoi. Bári kezeń-kezeńmen bolady. Mysaly qańtar aiynda álem chempionaty bolsa, soǵan deiin doping qabyldaimyz. Qabyldaǵanymyzdy moiyndaimyz. Meniń ornyma inim tapsyrǵandyqtan taldaý nátijesi taza bolyp shyǵady.
Men ary óz aǵzammen taza 200 keli ǵana kóteremin. Doping qabyldap 230 keli kóteremin. Onsyz bolmaidy. Ol kezde ministr... Arystanbek Muhamediuly, odan keiin Talǵat Ermegiiaev boldy. Munyń bári ministrdiń isi", - deidi sportshy jýrnalist Nurseiit Jylqyshybaiǵa bergen suhbatynda.
Onyń sózinshe, Talǵat Ermegiiaev halyqaralyq aýyr atletika federatsiiasynyń prezidentimen kelise alatyn jalǵyz adam bolǵan.
"Mysaly Qazaqstanǵa Vengriiadan tekserý keledi. Bári odan habardar. Tamash Aian (halyqaralyq aýyr atletika federatsiiasynyń prezidenti) dopingke tekseris jiberedi. Biraq Talǵat Ermegiiaev olarmen kelisip qoiady. "Má, saǵan 1 million dollar, kelistik" dep ketedi. Talǵat Ermegiiaevke bizdiń júlde ákelgenimiz kerek, sebebi ol ministr ǵoi. Abyroiy úshin kerek. Biraq Talǵat Ermegiiaevti jaqsy kóremin, ony qamap tasmaǵanda, aýyratletika myqty bolar edi. Sebebi ol Tamash Aianmen tikelei kelise alatyn jalǵyz adam edi. Basqa eshkim kelise almaityn", - deidi sportshy.
Eske salaiyq,2016 jyly asa iri kólemde para alǵan "Astana EKSPO-2017" ulttyq kompaniiasynyń eks basshysy, burynǵy týrizm jáne sport ministri Talǵat Ermegiiaev sottalǵan bolatyn.Ol jazasyn qylmystyq-atqarý júiesiniń aralas qaýipsizdik mekemelerinde ótep jatyr.
Buǵan deiin Ermegiiaevtiń túrmede jeke kabineti bolǵan degen qaýeset taraǵan bolatyn. QR Bas prokýratýrasy zańdyq kúshine engen úkimderdiń zańdylyǵyn jáne olardyń oryndalýyn qadaǵalaý qyzmetiniń bastyǵy Qairat Jaqypbaev jýrnalistermen baspasóz maslihatyn ótkizip, "Astana EKSPO-2017" ulttyq kompaniiiasynyń burynǵy basshysyna túrmede jasalǵan jaǵdai týraly aityp berdi.
"Shyn máninde Ermegiiaev VIP-kamerada otyrdy degen aqparat shyndyqqa janaspaidy. Tek jazasyn óteý mekemesinde oǵan arnaiy kabinet jabdyqtalǵan. Oǵan qosa, Ermegiiaev otyrǵan kamerada oǵan belgili bir dərejede jeńildikter berilgen», - dedi Qairat Jaqypbaev.
Sondai-aq, Jaqypbaevtyń sózine súiensek, sottalǵan azamatqa kúndiz azdap erkindik berilgenimen, túnde ol kamerasynda jatqan.
"Bul oqiǵaǵa qatysty qylmystyq is qozǵalyp, qyzmetkerler jumystan shyǵaryldy. 16 adam jazaǵa tartyldy. Qańtar aiynda prokýrorlar barlyq túzeý mekemelerin tekserip shyqty. Onda sottalǵan azamattardan uialy telefon, turmystyq tehnika, kilem men jihazdar tabylǵan", - dedi Jaqypbaev.
