Qazaqstanda dombyra men qobyzdy ushaq salonynda alyp júrýge ruqsat berilýi múmkin. Bul Kólik ministrligi ázirlegen áýe kóligimen jolaýshylardy, bagajdy jáne júkterdi tasymaldaý qaǵidalaryna engiziletin ózgerister jobasynda qarastyrylǵan, dep habarlaidy dalanews.kz.
Ministrliktiń málimetinshe, ózgerister jolaýshylardyń quqyqtaryn qorǵaýdy kúsheitýge, qyzmet kórsetý sapasyn arttyrýǵa jáne áýe tasymaly salasyndaǵy qoldanystaǵy talaptardy halyqaralyq standarttarǵa sáikestendirýge baǵyttalǵan.
Jobaǵa sáikes, mýzykalyq aspaptardy belgilengen talaptar saqtalǵan jaǵdaida qol júgi retinde, jeke jolaýshy ornyna ornalastyryp nemese tirkelgen bagaj retinde tasymaldaýǵa múmkindik beriledi. Sondai-aq qorǵanysh qaptamasyna salynǵan dombyra men qobyzdy ushaq salonynda alyp júrýge ruqsat berý usynylyp otyr.
Bul rette mýzykalyq aspaptyń ólshemi 110×35×30 santimetrden, al salmaǵy 10 keliden aspaýy tiis.
Budan bólek, qujatta janýarlardy áýe kompaniialary belgilegen talaptarǵa sáikes ushaq salonynda tasymaldaý múmkindigi qarastyrylǵan. Sondai-aq múgedektigi bar jolaýshylarǵa áýe tasymaly kezinde jeńildikter berý normasyn zańnamalyq deńgeide bekitý usynylǵan.
Joba aiasynda jolaýshylardyń quqyqtaryn qorǵaýǵa baǵyttalǵan taǵy birneshe ózgeris engizilmek. Atap aitqanda, reis syiymdylyǵy az basqa áýe kemesine aýystyrylǵan jaǵdaida birinshi kezekte kámeletke tolmaǵan balalardyń, múgedektigi bar adamdardyń, aýyr naýqastardyń, júkti áielderdiń jáne zeinet jasyndaǵy azamattardyń tasymaly qamtamasyz etiledi.
Sonymen qatar jolaýshyny jetkizý keshikken jaǵdaida tólenetin ótemaqynyń naqty merzimin belgileý usynylyp otyr. Eger jolaýshy tiisti ótinish berse, áýe kompaniiasy tólemdi 10 kúntizbelik kún ishinde júzege asyrýy tiis. Buǵan qosa, tasymaldaýshynyń kinási dáleldengen jaǵdaida tirkelmegen qol júginiń búlinýine qatysty áýe kompaniialarynyń jaýapkershiligin naqtylaý kózdelgen.
Aita keteiik, ázirge bul – buiryq jobasy. Qujat qoǵamdyq talqylaý úshin "Ashyq NQA" portalynda jariialanǵan. Ózgerister qabyldanǵan jaǵdaida Qazaqstandaǵy áýe tasymalynyń qolailylyǵy artyp, jolaýshylardyń quqyqtaryn qorǵaý tetikteri kúsheie túsedi.
