Qazaqstannyń halyq ártisi, belgili ánshi Maqpal Júnisova ushaqqa dombyrasyn alyp kirý úshin qosymsha aqy tóleýge májbúr bolǵan, dep habarlaidy Dalanews.kz.
Ánshi bilik ókilderine bul jaǵdaidyń birneshe ret qaitalanǵanyn eske saldy.
“Qurmetti depýtattar, ushaqqa dombyrany ótkizý máselesi qaita týyndap jatyr. Bul jaǵdaidy tezirek qolǵa alýlaryńyzdy suraimyn! Áýe kompaniia qyzmetkerleri dombyra dep kórsetpese de, ony 59 myń teńgege áreń ótkizdik. Mundai jaǵdaimen úshinshi ret betpe-bet kelip otyrmyn”, – dedi Maqpal Júnisova.
Ánshiniń shaǵymynan keiin FlyArystan áýe kompaniiasynan jaýap keldi.
Kompaniia mýzykalyq aspaptardy tasymaldaý boiynsha arnaiy belgilengen ereje bar ekenin alǵa tartty.
“Eger aspaptyń salmaǵy 5 kg-nan aspasa jáne kólemi 56x23x36 sm-den úlken bolmasa qol júgi retinde salonǵa alyp ótýge ruqsat beriledi. Biz barlyq óner ieleriniń eńbegin joǵary baǵalaimyz jáne halqymyz úshin qasietti dombyranyń qundylyǵyn túsinemiz.
Degenmen barlyq jolaýshyǵa teń qarym-qatynas kórsetý jáne ortaq erejelerdi saqtaý – qaýipsizdikti qamtamasyz etýdiń kepili”, – delingen FlyArystan habarlamasynda.
Eske salaiyq, óner iesi buǵan deiin gastroldik sapar aiasynda Qaraǵandyǵa jol júrip bara jatqanda, áýejai qyzmetkerleri dombyrasy men kontserttik bas kiimin ushaqqa kirgizýge ruqsat bermegenin jetkizgen edi. Videony ánshi áleýmettik jelidegi paraqshasynda jariialady.
"Qurmetti halaiyq, áýejaida otyrmyn. Qaraǵandyda kontsertim.
Dombyram men baskiimimdi "mundai júkti ótkizýge bolmaidy, biraq kishkentai chemodanyńyzdy alyp óte berińiz" deidi.
Sizder sonymen kelisesizder me? Baskiimdi chemodanǵa tyǵa almaimyn. Maiysyp qalady", - dedi ol.
Ashynǵan ánshi amaly quryp, taǵy bir oryn satyp alǵan.
"Dombyram men baskiimime jeke oryn satyp aldyq. 65 myń teńge. Qurmetti Prezident Qasym-Jomart Kemeluly, qazaqtyń dombyrasyn ótkizbei, osyndai bolyp jatyr. Endi gastrolge shyqpaimyn, zańdy ózgertpeseńizder, gastrolge barmaimyz", - dedi halyq ártisi.
Buǵan deiin ushaqta dombyra alyp júre almaǵan ánshiler osy máseleni kótergen edi. Solardyń biri - aitysker aqyn Aisholpan Tileýtai. Ol Maqpal Júnisovanyń jelidegi osy jazbasyna pikir jazyp, bul másele jabýly qazan kúiinde qalǵanyn aitty.
"Qazaqtyń dombyrasyn syidyrmasa,
Ne paida ushaǵyńnyń keńdiginen?! - dep áýe kompaniialarǵa osy máseleni sheshýlerin surap júrgenime 2 jyl boldy! Birde-bir qorytyndy shyǵarǵan joq. Joǵarydaǵylar da esitemegen adam qusap otyr ǵoi kereń bolyp", - dedi ol.
